រដ្ឋាភិបាលចិន នៅសប្តាហ៍នេះបានចេញរបាយការណ៍មួយ ដោយរិះគន់ធ្ងន់ៗទៅលើការអនុវត្តសិទ្ធិមនុស្សរបស់សហរដ្ឋអាមេរិក។
ការបង្ហាញរបាយការណ៍សិទ្ធិមនុស្សប្រចាំឆ្នាំ២០១៨ នៅសហរដ្ឋអាមេរិក ដោយប្រទេសចិនធ្វើឡើងដើម្បីជាការឆ្លើយតបទៅនឹងសហរដ្ឋអាមេរិក ដែលបានបរិហារពីបញ្ហាសិទ្ធមនុស្សរបស់ប្រទេសកុម្មុយនីស្តមួយនេះ ក្នុងរបាយការណ៍មួយដែលចេញកាលពីថ្ងៃពុធ។
ការិយាល័យព័ត៌មានក្រុមប្រឹក្សារដ្ឋនៃសាធារណរដ្ឋប្រជាមានិតចិន បានលើកឡើងក្នុងរបាយការណ៍កម្រាស់២១ទំព័រ ដែលត្រូវបានបង្ហោះលើគេហទំព័រទីភ្នាក់ងារសារព័ត៌មានចិនស៊ិនហួរកាលពីម្សិលមិញ ថាកំណត់ត្រានៃការអនុវត្តសិទ្ធិមនុស្សប្រចាំឆ្នាំ២០១៨ របស់ប្រទេសជាង១៩០ ដែលចេញដោយសហរដ្ឋអាមេរិក ជាការចោទប្រកាន់ខុសការពិត និងបំផ្លាញកេរ្តិ៍ឈ្មោះប្រទេសដទៃ។ ចិន បានរិះគន់ធ្ងន់ៗថា អាមេរិកខ្លួនឯងទេ ដែលមិនអើពើពីបញ្ហាសិទ្ធិមនុស្សដ៏ធ្ងន់ធ្ងរដែលកំពុងកើតមានក្នុងប្រទេសរបស់ខ្លួន។
រដ្ឋាភិបាលប្រទេសកុម្មុយនីស្តមួយនេះ បានលើកឡើងក្នុងរបាយការណ៍ដដែលថា ប្រសិនបើគេក្រលេកមើលទៅលើស្ថានភាពសិទ្ធិមនុស្សនៅសហរដ្ឋអាមេរិកក្នុងឆ្នាំ២០១៨ គេនឹងមើលឃើញដោយងាយថា ប្រទេសដែលហៅខ្លួនឯងជា «អ្នកការពារសិទ្ធិមនុស្ស» មួយនេះ មានកំណត់ត្រាអនុវត្តន៍សិទ្ធិមនុស្សដែលមានចំណុចខ្វះខាត ចន្លោះប្រហោង ហើយមានស្ដង់ដារពីរថែមទៀតផង។
បញ្ហាសិទ្ធិមនុស្សនៅសហរដ្ឋអាមេរិក ដែលចិនបានបង្ហាញក្នុងរបាយការណ៍នោះ រួមមាន ការកើនឡើងនៃអំពើហិង្សាដោយការប្រើប្រាស់កាំភ្លើង, ការរើសអើងជាតិសាសន៍ និងសាសនា, ការឃ្លាំមើលតាមអ៊ិនធឺណិតដែលធ្វើឲ្យប៉ះពាល់ជីវិតឯកជន, គម្លាតប្រាក់ចំណូល, គោលនយោបាយអន្តោរប្រវេសន៍ បំបែកកូនចេញពីឪពុកម្ដាយ, សេរីភាពសារព័ត៌មានត្រូវរងការធ្វើទុក្ខបុកម្នេញ, និងការដកខ្លួនរបស់អាមេរិកចេញពីក្រុមប្រឹក្សាសិទ្ធិមនុស្សអង្គការសហប្រជាជាតិជាដើម។
ទោះយ៉ាងណាក៏ដោយ ចិនមិនបានបញ្ជាក់ឲ្យច្បាស់លាស់ពីវិធីសាស្រ្តក្នុងការចងក្រងរបាយណ៍នេះឡើយ។
ក្រសួងការបរទេសសហរដ្ឋអាមេរិកកាលពីថ្ងៃទី១៣ ខែមីនា ឆ្នាំ២០១៩ បានចេញរបាយការណ៍មួយស្តីពីស្ថានភាពសិទ្ធិមនុស្សប្រចាំ២០១៨ នៅក្នុងប្រទេសជាង១៩០។ ក្នុងកំណត់ត្រានោះ អាមេរិកបានវាយប្រហារចិនជាច្រើនចំណុចទាក់នឹងនឹងការអនុវត្តសិទ្ធិមនុស្សនៅក្នុងប្រទេសនេះនាឆ្នាំ២០១៨។
បញ្ហាមួយក្នុងចំណោមបញ្ហាជាច្រើន ហើយភាគីចិនតែងតែច្រានចោលនោះគឺបញ្ហានៃការចាប់ខ្លួនជនជាតិអ៊ុយហ្គួរ។ ក្នុងរបាយការណ៍នោះ អាមេរិក លើកឡើងថា កាលពីឆ្នាំ២០១៨កន្លងទៅអាជ្ញាធរចិន បានបង្កើនយុទ្ធនាការរឹតបន្តឹងកាន់តែខ្លាំងលើជនជាតិភាគតិចដែលកាន់សាសនាឥស្លាមមួយនេះ។ អាមេរិក ថាចិនបានចាប់ខ្លួនជនជាតិអ៊ុយហ្គួរប្រមាណជាជាង២លាននាក់ដាក់ក្នុងជំរុំអប់រំកែប្រែ ក្នុងគោលបំណងដើម្បីលុបបំបាត់សាសនា និងអត្តសញ្ញាណរបស់ពួកគេ។
អាមេរិក ក៏បានរិះគន់ផងដែរជុំវិញការរឹតត្បិតរបស់អាជ្ញាធរចិនទៅលើសេរីភាពបញ្ចេញមតិ ការដើរហើរ ការប្រមូលផ្តុំ និងសេរីភាពសាសនារបស់ជនជាតិទីបេ ដែលកំពុងរស់នៅតំបន់ស្វយ័តទីបេ។
ក្រៅពីបញ្ហាទាំងនេះ របាយការណ៍របស់សហរដ្ឋអាមេរិកដដែលក៏បានបង្ហាញពីបញ្ហារំលោភសិទ្ធិមនុស្សមួយចំនួនទៀតនៅក្នុងប្រទេសចិនផងដែរ។ បញ្ហាទាំងនោះរួមមានការសម្លាប់ក្រៅប្រព័ន្ធច្បាប់, ការបង្ខំឲ្យបាត់ខ្លួន, ការធ្វើទារុណកម្ម, ការឃុំខ្លួនដោយមិនបានជំនុំជម្រះ, ការរុករានសិទ្ធិឯកជន,ការវាយប្រហារ និងកាត់ទោសអ្នកការសែត មេធាវី សកម្មជន, ការឃ្លាំមើលនិងរាំងខ្ទប់គេហទំព័រមួយចំនួន, ការជួញដូរមនុស្ស និងការរឹតបណ្ដឹងសិទ្ធកម្មករជាដើម។
ក្រសួងការបរទេសអាមេរិកបញ្ជាក់ថា របាយការណ៍នេះត្រូវបានចងក្រងឡើងដោយប្រើប្រាស់ព័ត៌មានពីស្ថានទូត និងស្ថានកុងស៊ុលសហរដ្ឋអាមេរិកនៅបរទេស មន្រ្តីរដ្ឋាភិបាលបរទេស អង្គការមិនមែនរដ្ឋាភិបាល និងអង្គការអន្តរជាតិ អ្នកជំនាញផ្នែកច្បាប់ អ្នកសារព័ត៌មាន អ្នកសិក្សាស្រាវជ្រាវ សកម្មជនការងារ និងរបាយការណ៍ដែលបានបោះពុម្ពផ្សាយដោយបេសកកម្មការទូតរបស់សហរដ្ឋអាមេរិកនៅបរទេស៕