សាលារាជធានីភ្នំពេញអំពាវនាវឲ្យប្រជាពលរដ្ឋទាក់ទងទៅមន្ត្រីជំរឿន ដើម្បីបញ្ចប់ជំរឿននៅថ្ងៃនេះ តាមទីកន្លែងដែលខ្លួនរស់នៅ។
យោងតាមសេចក្តីជូនដំណឹងរបស់រដ្ឋបាលរាជធានីភ្នំពេញ កាលពីថ្ងៃទី១៤ ខែមីនាម្សិលមិញនេះបានឲ្យដឹងថា ជំរឿននឹងពន្យារពេលមួយថ្ងៃនេះទៀត ដោយសារប្រជាជនមានការកើនឡើង។
ប្រភពដដែលបានឲ្យដឹងទៀតថា ចំពោះប្រជាពលរដ្ឋណាដែលមិនទាន់ទទួលបានការសម្ភាសន៍ អាចទំនាក់ទំនងទៅមន្ត្រីជំរឿននៅតាមរដ្ឋបាលសង្កាត់ និងខណ្ឌ ដែលខ្លួនរស់នៅ ដើម្បីបញ្ចប់ជំរឿននៅថ្ងៃនេះ។
កាលពីម្សិលមិញ អគ្គនាយិកានៃវិទ្យាស្ថានជាតិស្ថិតិ លោកស្រី ហង់ លីណា បានប្រាប់ វី.អូ.ឌី ថា មូលហេតុដែលបណ្តាលឲ្យមានការពន្យារពេលនេះ គឺមកពីកំណើនប្រជាជន និងភាសាក្នុងការទំនាក់ទំនង ជាពិសេសគឺនៅក្រុងព្រះសីហនុ និងរាជធានីភ្នំពេញ។
តាមការគ្រោងទុកការធ្វើជំរឿនទូទាំងប្រទេសឆ្នាំនេះ ចាប់ពីថ្ងៃទី៣ ដល់ថ្ងៃទី១៣ ខែមីនា ឆ្នាំ២០១៩នេះ ដោយមានមន្ត្រីជំរឿនប្រមាណ ៥ម៉ឺននាក់ទូទាំងប្រទេសប្រមូលព័ត៌មានពីពលរដ្ឋ។
