វៀតណាមព្យាយាមបញ្ចុះបញ្ចូលឲ្យក្រុមហ៊ុនបច្ចេកវិទ្យារបស់កូរ៉េខាងត្បូងSamsung បើកមជ្ឈមណ្ឌលសិក្សាស្រាវជ្រាវ និងអភិវឌ្ឍនៅក្នុងទីក្រុងហូជីមិញ ដើម្បីស្វែងយល់និងពង្រឹងសមត្ថភាពជំនាញដល់ពលរដ្ឋវៀតណាម។
តាមការចុះផ្សាយរបស់ទីភ្នាក់ងារសារព័ត៌មានវៀតណាមគឺ នាយកប្រតិបត្តិក្រុមហ៊ុនSamsung នៅវៀតណាមលោកChoi Joo-ho ជួបជាមួយអគ្គលេខាធិការបក្សកុម្មុយនីស្តនៅទីក្រុងហូជីមិញលោក Nguyen Thien Nhan កាលពីថ្ងៃទី១៤ខែមីនា។
នៅក្នុងជំនួបនោះលោក Nguyen Thien Nhan ថ្លែងថាផលិតផលរបស់ក្រុមហ៊ុននេះ បានដើរតួនាទីយ៉ាងសំខាន់ក្នុងការពង្រឹងទំនាក់ទំនងរវាងរដ្ឋាភិបាលកូរ៉េខាងត្បូង និង វៀតណាម។លោក ក៏បានសន្យាសម្របសម្រួលលក្ខខណ្ឌដើម្បីបង្កើនភាពងាយស្រួលក្នុងការផលិត និងពង្រីកទីផ្សាររបស់ក្រុមហ៊ុន Samsung នៅទីក្រុងហូជីមិញ។
លោក Nguyen Thien Nhan ថ្លែងថា លោកពិតជាសប្បាយចិត្តណាស់ បើសិនជាSamsung បើកមជ្ឈមណ្ឌលសិក្សាស្រាវជ្រាវ ដើម្បីពង្រីកសមត្ថភាពធនធានមនុស្សនៅវៀតណាមដើម្បីជួយដល់ក្រុមហ៊ុន។
ក្នុងជំនួបនោះ លោកChoi Joo-ho សន្យាថា នឹងសិក្សាលើសំណើនេះ ហើយលោកមានជំនឿថា អាចសហការជាមួយវៀតណាមកាន់តែរីកចម្រើន។
