តុលាការកម្ពុជា បានសម្រេចចេញដីកាបង្គាប់ឲ្យចាប់ខ្លួនលោក សម រង្ស៊ី និងអតីតតំណាងរាស្ត្របក្សប្រឆាំង ៧រូបទៀត ដោយចោទថា «រួមគំនិតក្បត់ និងញុះញង់ឲ្យប្រព្រឹត្តបទឧក្រិដ្ឋជាអាទិ៍»។
ក្នុងដីកាចំនួន ៨ដាច់ដោយឡែកពីគ្នាចុះកាលពីថ្ងៃទី១២ ខែមីនា ឆ្នាំ២០១៩ ចៅក្រមស៊ើបសួរសាលាដំបូងរាជធានីភ្នំពេញ លោក កូយ សៅ បានបញ្ជាឲ្យកងកម្លាំងសាធារណៈធ្វើការស្រាវជា្រវរក និងចាប់ខ្លួនប្រធានស្ដីទីគណបក្សសង្គ្រោះជាតិ លោក សម រង្ស៊ី ក្រោមការចោទពីបទ «រួមគំនិតក្បត់ និងញុះញង់ឲ្យប្រព្រឹត្តបទឧក្រិដ្ឋជាអាទិ៍» ប្រព្រឹត្តកាលពីខែមករាកន្លងទៅ។
ក្រៅពីលោក សម រង្ស៊ី អតីតមន្ដ្រីជាន់ខ្ពស់គណបក្សសង្គ្រោះជាតិ ៧រូបទៀត ក៏ត្រូវបានតុលាការបង្គាប់ឲ្យចាប់ខ្លួនផងដែរ រួមមាន លោក អេង ឆៃអ៊ាង លោក ហូរ វ៉ាន់ លោក ម៉ែន សុថាវរិន្ទ្រ លោក តុ វ៉ាន់ចាន់ លោក ឡុង រី លោក អ៊ូ ច័ន្ទឬទ្ធិ និងលោកស្រី មូរ សុខហួរ។
អតីតប្រធានគណបក្សសង្គ្រោះជាតិ លោក សម រង្ស៊ី កំពុងនិរទេសខ្លួនឯងនៅឯបរទេស បន្ទាប់ពីប្រឈមមុខនឹងបណ្ដឹងជាច្រើនតាមផ្លូវតុលាការនៅក្នុងប្រទេសកម្ពុជា ដែលប្ដឹងដោយមេដឹកនាំបក្សប្រឆាំង ក្នុងនោះមានទាំងបណ្ដឹងរបស់លោកនាយករដ្ឋមន្ត្រី ហ៊ុន សែន ផងដែរ។
ចំណែកឯអតីតតំណាងរាស្ត្របក្សប្រឆាំងទាំង ៧រូបទៀត សុទ្ធតែនិរទេសខ្លួនឯងទៅក្រៅប្រទេស ក្រោយពីគណបក្សសង្គ្រោះជាតិ ត្រូវបានតុលាការកំពូលសម្រេចរំលាយចោលកាលពីពាក់កណ្ដាលខែវិច្ឆិកា ឆ្នាំ២០១៧កន្លងមក៕
