អតីតមន្រ្តីជាន់ខ្ពស់បក្សកុម្មុយនីស្តចិនដែលទទួលបន្ទុកផ្នែកថាមពលម្នាក់ ត្រូវបានបណ្ដេញចេញពីបក្ស និងត្រូវដាក់ឲ្យស្ថិតក្រោមការស៊ើបអង្កេតរបស់តុលាការ ជុំវិញការប្រើប្រាស់តួនាទីក្នុងការប្រព្រឹត្តអំពើពុករលួយ ។
គណៈកម្មការអធិការកិច្ចវិន័យរបស់បក្សកុម្មុយនីស្ត និងគណៈកម្មការជាតិប្រឆាំងអំពើពុករលួយចិន កាលពីថ្ងៃសៅរ៍ បានចេញសេចក្តីប្រកាសព័ត៌មានមួយថា លោក Nur Bekri អតីតប្រធានអាជ្ញាធរថាមពលជាតិ និងជាអនុប្រធានគណៈកម្មការកំណែទម្រង់និងអភិវឌ្ឍន៍ជាតិ ត្រូវបានរកឃើញថា បានប្រើប្រាស់ដំណែងដើម្បីបម្រើផលប្រយោជន៍ផ្ទាល់ខ្លួន។ តាមការចុះផ្សាយរបស់មជ្ឈមណ្ឌលព័ត៌មានតាមអ៊ិនធឺណិតរបស់រដ្ឋាភិបាលចិន លោក Nur Bekri បានប្រើប្រាស់តួនាទីដោយរំលោភច្បាប់ក្នុងករណីមួយចំនួនដូចជា ជួយមន្រ្តីដទៃឲ្យឡើងដំណែង សម្របសម្រួលដល់ដំណើរការរបស់ក្រុមហ៊ុនសហគ្រាស និងកេងប្រវ័ញ្ចធនធានរ៉ែជាដើម។ ប្រភពដដែល បានឲ្យដឹងផងដែរថា មន្រ្តីជាន់ខ្ពស់រូបនេះក៏ត្រូវបានចោទប្រកាន់ពីការទទួលយកសំណូកដោយផ្ទាល់ និងតាមរយៈសមាជិកគ្រួសាររបស់លោកផងដែរ។
ក្រៅពីនេះ លោក Nur Bekri ត្រូវបានរកឃើញទោសមួយចំនួនទៀតផងដែរដូចជា រស់នៅដោយភាពហ៊ឺហាចំណាយប្រាក់ខ្ជះខ្ជាយ និងប្រើប្រាស់អំណាចដើម្បីជាការដោះដូរនឹងការរួមភេទជាដើម។
តាមគណៈកម្មការអធិការកិច្ចវិន័យរបស់បក្សកុម្មុយនីស្ត និងគណៈកម្មការជាតិប្រឆាំងអំពើពុករលួយចិន ការប្រព្រឹត្តរបស់លោក Nur Bekri ជាការរំលោភលើគោលការណ៍បក្សកុម្មុយនិស្ត និងច្បាប់របស់ប្រទេសចិនយ៉ាងខ្លាំង។ អាជ្ញាធរចិន បានលើកឡើងបន្តថា ករណីនេះជាគំរូដ៏អាក្រក់មួយ ហើយជនល្មើសគួរតែត្រូវដាក់ទោសឲ្យបានធ្ងន់ធ្ងរ។
ប្រភពដដែល ឲ្យដឹងទៀតថា ទ្រព្យសម្បត្តិដែលលោក Nur Bekri រកបានដោយខុសច្បាប់ត្រូវបានរឹបអូស ហើយករណីរបស់គាត់ត្រូវបានបញ្ជូនទៅតុលាការដើម្បីបន្តនីតិវិធីជំនុំជម្រះ ។
លោក Nur Bekri ជាជនជាតិភាគតិចអ៊ុយហ្គួរមកពីតំបន់ស៊ីនជាំងតែម្នាក់គត់ ដែលមានតួនាទីនិងអំណាចក្នុងជួរបក្សកុម្មុយនីស្តចិន។ លោក ធ្លាប់ធ្វើជាអភិបាលតំបន់ស្វយ័តស៊ីនជាំងពីឆ្នាំ២០០៨ ដល់ ២០១៤។
ដំណើរការកាត់ទោសលោក Nur Bekri ធ្វើឡើងស្របពេលដែលមានការរិះគន់ពីសហរដ្ឋអាមេរិក និងបណ្ដាអង្គការសិទ្ធិមនុស្សមួយចំនួនថា អាជ្ញាធរចិនកំពុងតែបង្កើនការឃ្លាំមើល និងគាបសង្កត់ទៅលើជនជាតិភាគតិចអ៊ុយហ្គួរនៅតំបន់ស្វយ័តស៊ីនជាំង។
ក្រសួងការបរទេសសហរដ្ឋអាមេរិកកាលពីថ្ងៃទី១៣ ខែមីនា ឆ្នាំ២០១៩ បានចេញរបាយការណ៍មួយស្តីពីស្ថានភាពសិទ្ធិមនុស្សប្រចាំឆ្នាំ២០១៨ នៅក្នុងប្រទេសជាង១៩០។ ក្នុងកំណត់ត្រានោះ អាមេរិកបានវាយប្រហារចិនជាច្រើនចំណុចទាក់នឹងនឹងការអនុវត្តសិទ្ធិមនុស្សនៅក្នុងប្រទេសនេះ ជាពិសេសបញ្ហាជនជាតិភាគតិចអ៊ុយហ្គួរ។ អាមេរិក លើកឡើងថា អាជ្ញាធរចិនបានចាប់ខ្លួនជនជាតិអ៊ុយហ្គួរប្រមាណជាជាង២លាននាក់ដាក់ក្នុងជំរុំអប់រំកែប្រែ ក្នុងគោលបំណងដើម្បីលុបបំបាត់សាសនា និងអត្តសញ្ញាណរបស់ពួកគេ។
ទោះយ៉ាងណាក៏ដោយ អាជ្ញាធរចិនមិនដែលទទួលស្គាល់ការចោទប្រកាន់ទាំងអស់នោះទេ។ ប្រទេសកុម្មុយនីស្តមួយនេះ តែងតែអះអាងថា សកម្មភាពកន្លងមករបស់សមត្ថកិច្ចខ្លួនធ្វើឡើងដើម្បីរក្សាស្ថិរភាព សន្តិភាព ក៏ដូចជាសុខមាលភាពរបស់ប្រជាជននៅក្នុងតំបន់ស៊ីនជាំង។ ចិន បានលើកឡើងក្នុងសៀវភៅសរបស់ខ្លួនដែលមានចំណងជើងថា «ការប្រយុទ្ធប្រឆាំងនឹងភេរវកម្ម អំពើជ្រុលនិយម និងការការពារសិទិ្ធមនុស្សនៅស៊ីនជាំង» ដែលចេញផ្សាយនៅថ្ងៃទី១៨ ខែមីនា ឆ្នាំ២០១៩ នេះ ថាមជ្ឈមណ្ឌលអប់រំនិងបណ្តុះបណ្តាលត្រូវបានបង្កើតឡើងនៅតំបន់ស៊ីនជាំងក្នុងគោលបំណងអប់រំ និងស្តារនីតិសម្បទាពលរដ្ឋដែលមានកំហុសតូចតាច ឬរំលោភបំពានច្បាប់។ ជំរុំអប់រំនោះ ក៏ជួយលុបបំបាត់ឥទ្ធិពលនៃអំពើភេរវកម្ម និងភាពជ្រុលនិយម ហើយអាចរារាំងប្រជាជនមិនឱ្យក្លាយជាជនរងគ្រោះនៃអំពើទាំងនេះផងដែរ៕
