មន្ត្រីនគរបាលខេត្តសៀមរាប បានឲ្យដឹងថា សមត្ថកិច្ចកំពុងរៀបចំបញ្ជូនជនជាតិជប៉ុន ២នាក់ទៅតុលាការឲ្យចាត់ការតាមនីតិវិធីច្បាប់ ក្រោយពីជនជាតិជប៉ុននោះ បានសម្លាប់បុរសជនជាតិខ្មែរ ដើម្បីប្លន់យករថយន្ដ។
ស្នងការរងខេត្តសៀមរាប លោក ភឹង ចិន្តារ៉េត ប្រាប់ វីអូឌី នៅថ្ងៃនេះថា សមត្ថកិច្ចរៀបចំបញ្ជូនសំណុំរឿង រួមទាំងជនជាតិជប៉ុនទាំងពីរនាក់ទៅសាលាដំបូងខេត្តនាថ្ងៃនេះ ករណីដែលជនជាតិជប៉ុនទាំងនោះ បានសម្លាប់បុរសជាអ្នករត់តាក់ស៊ីម្នាក់នៅស្រុកពួកកាលពីថ្ងៃទី១៧ ខែមីនា ឆ្នាំ២០១៩ ដើម្បីប្លន់យករយន្ត។
បើតាមស្នងការ ជនរងគ្រោះដែលត្រូវជប៉ុនសម្លាប់មាន ឈ្មោះ ហ៊ឹម ចាន់ ភេទប្រុស រស់នៅភូមិជាន់ត្រាច ឃុំឈូកដាច់ ស្រុកបារាយណ៍ ខេត្តកំពង់ធំ៕
