ក្រុមហ៊ុនលំដាប់ពិភពលោករបស់កូរ៉េខាងត្បូង Samsung សម្រេចបើកមជ្ឈមណ្ឌលទី៣របស់ខ្លួនដើម្បីដាក់តាំងផលិតផល បទពិសោធន៍ និងរបកគំឃើញថ្មីៗនៅវៀតណាម បន្ទាប់ពីមជ្ឈមណ្ឌលទី១នៅអាមេរិក និងទី២នៅអាល្លឺម៉ង់។
ការប្រកាសធ្វើឡើងតែប៉ុន្មានថ្ងៃក្រោយក្រុមហ៊ុននេះបើកកន្លែងរក្សាផលិតផលរបស់ខ្លួនអគារចំនួន៨ជាន់នៅទីក្រុងតូក្យូប្រទេសជប៉ុន។
កាលពីសប្តាហ៍មុននាយកប្រតិបត្តិក្រុមហ៊ុន Samsung នៅវៀតណាមលោក Choi Joo-ho ជួបជាមួយអគ្គលេខាធិការបក្សកុម្មុយនីស្តនៅទីក្រុងហូជីមិញ លោក Nguyen Thien Nhan។
នៅក្នុងជំនួបនោះលោក Nguyen Thien Nhan ថ្លែងថា ផលិតផលរបស់ក្រុមហ៊ុននេះ បានដើរតួនាទីយ៉ាងសំខាន់ក្នុងការពង្រឹងទំនាក់ទំនងរវាងរដ្ឋាភិបាលកូរ៉េខាងត្បូង និង វៀតណាម។លោក ក៏បានសន្យាសម្របសម្រួលលក្ខខណ្ឌ ដើម្បីបង្កើនភាពងាយស្រួលក្នុងការផលិត និងពង្រីកទីផ្សាររបស់ក្រុមហ៊ុន Samsung នៅទីក្រុងហូជីមិញ។
លោក Nguyen Thien Nhan ថ្លែងថា លោកពិតជាសប្បាយចិត្តណាស់ បើសិនជា Samsung បើកមជ្ឈមណ្ឌលរបស់ខ្លួន ដើម្បីពង្រីកសមត្ថភាពធនធានមនុស្សនៅវៀតណាមដើម្បីជួយដល់ក្រុមហ៊ុន។
តាមការចុះផ្សាយរបស់ក្រុមហ៊ុន Samsung នៅថ្ងៃនេះបានឲ្យដឹងថា មជ្ឈមណ្ឌលនេះមានទីតាំងនៅកណ្តាលទីក្រុងហូជីមិញ។ មជ្ឈមណ្ឌលនេះ បែងចែកជាបួនតំបន់ ហើយតំបន់និមួយៗ អ្នកទស្សនាអាចមើលបច្ចេកវិទ្យាថ្មីនៃផលិតផលរបស់ Samsung ។
Kyung Wook Suh ជាប្រធានផ្នែក Samsung Vina Electronics ថ្លែងថា មជ្ឈមណ្ឌលថ្មីនេះនឹងក្លាយជាគោលដៅនៃបច្ចេកវិទ្យាប្រចាំសហស្សវត្សរ៍ (១០០០ឆ្នាំ) នៅក្នុងតំបន់។
ក្រុមហ៊ុន Samsung បញ្ជាក់ថា វៀតណាមគឺជាទីផ្សារល្អមួយ ដែលក្រុមហ៊ុនទូរសព្ទទំនើបផ្សេងៗទៀតកំពុងតែពិចារណា ដែលដំណើរការផលិត និងធនធានអាចទុកចិត្តបាន។
របាយការណ៍របស់រដ្ឋាភិបាលវៀតណាមបង្ហាញថា ផលិតផលរោងចក្រ Samsung នៅក្នុងប្រទេសវៀតណាមនៅឆ្នាំ២០១៨ លក់បាន៣ប៊ីលានដុល្លារ ជាចំណូលធំមួយក្នុងចំណោមចំណូលក្រុមហ៊ុនសរុបប្រចាំឆ្នាំ ៦០ប៊ីលានដុល្លារ។
បច្ចុប្បន្នវៀតណាមបានផលិតទូរសព្ទទំនើប ហើយការបង្កើតមជ្ឈមណ្ឌលរបស់ក្រុមហ៊ុនកូរ៉េខាងត្បូងនេះ នឹងជួយផ្នែកបច្ចេកវិទ្យាកាន់តែសំខាន់មួយផ្នែកទៀតដល់វៀតណាម។
