រដ្ឋមន្ត្រីក្រសួងមហាផ្ទៃ លោក ស ខេង បានអំពាវនាវដល់ប្រជាពលរដ្ឋ និងអាជ្ញាធរបង្កើនការប្រុងប្រយ័ត្ន និងបង្ការគ្រោះថ្នាក់អគ្គីភ័យនៅរដូវប្រាំង បន្ទាប់ពីមានករណីកើតឡើងជាបន្តបន្ទាប់ក្នុងរយៈពេលប៉ុន្មានថ្ងៃនេះ។
លោក ស ខេង នៅថ្ងៃនេះបានចេញលិខិតមួយដោយអំពាវនាវពលរដ្ឋ និងកងកម្លាំងទាំងអស់ត្រូវបង្កើនការប្រុងប្រយ័ត្នចំពោះដើមចម ដែលអាចបង្កើតឲ្យមានគ្រោះអគ្គីភ័យ។ លោកថា តាមការព្យាករណ៍ឧតុនិយម អាកាសធាតុនៅប្រទេសកម្ពុជានឹងឡើងកំដៅរហូតដល់លើស ៤០អង្សា ដែលនឹងធ្វើឲ្យអាកាសធាតុក្ដៅ ហួតហែង ងាយនឹងបណ្ដាលឲ្យកើតគ្រោះអគ្គីភ័យ ។
លោក ស ខេង ក៏បានដាក់បទបញ្ជាដល់នគរបាលបង្ការពន្លត់អគ្គីភ័យតាមបណ្តារាជធានី-ខេត្ត ត្រូវពង្រីកការងារប្រចាំការ ២៤ម៉ោង លើ២៤ម៉ោង និងត្រូវត្រៀមជាស្រេចនូវរថយន្តពន្លត់អគ្គីភ័យ ឧបករណ៍សម្ភារ ប្រេងឥន្ធនៈ និងទឹកជាដើម បម្រើឲ្យការពន្លត់អគ្គីភ័យ និងសង្គ្រោះ បានឆាប់រហ័ស និងមានប្រសិទ្ធភាព។
កាលពីថ្ងៃទី១៧ ខែមីនា ឆ្នាំ២០១៩ អគ្គីភ័យបានបំផ្លិចបំផ្លាញផ្ទះប្រជាពលរដ្ឋរហូតទៅដល់៤៧ខ្នង នៅក្នុងខណ្ឌមានជ័យ រាជធានីភ្នំពេញ។ ដោយឡែក នៅយប់ថ្ងៃទី១៨ ខែមីនា គ្រោះអគ្គីភ័យក៏បានសម្លាប់មនុស្សចំនួន២នាក់ផងដែរនៅខេត្តមណ្ឌលគិរី។
កាលពីឆ្នាំ២០១៨កន្លងទៅ អគ្គីភ័យ បានកើតឡើងចំនួន ៥៣៤ករណី នៅទូទាំងប្រទេស ដែលបណ្ដាលឲ្យមនុស្ស ២២នាក់ ស្លាប់ និង៤៩នាក់ របួស៕
