លោក Nursultan Nazarbayev ប្រធានាធិបតីកាហ្សាក់ស្ថានដែលកាន់អំណាចជិត៣ទសវត្ស បានធ្វើការប្រកាសដ៏គួរឲ្យភ្ញាក់ផ្អើលពីការលាលែងពីតំណែងរបស់លោក។
ការប្រកាសរបស់ប្រធានាធិបតីដែលក្តោបក្តាប់អំណាចជិត៣០ឆ្នាំរូបនេះ បានធ្វើឡើងតាមកញ្ចក់ទូរទស្សន៍របស់រដ្ឋកាលពីម្សិលមិញ។ លោក Nazarbayev ត្រូវបានសារព័ត៌មានBBC ដកស្រង់សម្តីមកផ្សាយបន្តថា ការសម្រេចចិត្តលាលែងតំណែងជាប្រធានាធិបតីរបស់លោកមិនមែនជារឿងងាយស្រួលនោះទេ ប៉ុន្តែអ្វីដែលលោកធ្វើនៅពេលនេះ គឺដើម្បីផ្ដល់ឱកាសឲ្យអ្នកដឹកនាំជំនាន់ក្រោយ។
ប្រធាធិបតីវ័យ៧៨ឆ្នាំរូបនេះ បានលើកឡើងទៀតថា ការងាររបស់លោកពេលនេះគឺជួយអ្នកនាំដឹកជំនាន់ក្រោយឲ្យបន្តធ្វើកំណែទម្រង់ក្នុងប្រទេសកាហ្សាក់ស្ថានបន្ថែមទៀត។
តាមលោក Nazarbayev ប្រធានព្រឹទ្ធសភាលោក Kassym-Jomart Tokayev និងកាន់តំណែងជាប្រធានាធិបតីកាហ្សាក់ស្ថានបណ្ដោះអាសន្នរហូតដល់ខែមេសា ឆ្នាំ២០២០។
អង្គការ Freedom House ដែលមានមូលដ្ឋាននៅសហរដ្ឋអាមេរិក បានចេញសេចក្តីថ្លែងការណ៍មួយស្វាគមន៍ការសម្រេចចិត្តរបស់ប្រធានាធិបតីរូបនេះ។ អង្គការដែលធ្វើការលើការលើកកម្ពស់សេរីភាព និងដំណើរប្រជាធិបតេយ្យនេះ ថាការសម្រេចចិត្តរបស់ប្រធានាធិបតី Nazarbayev គឺជាឧទាហរណ៍ដ៏កម្រមួយនៃការផ្ទេរអំណាចដោយស្ម័គ្រចិត្តនៅអាស៊ីកណ្តាល ហើយវាផ្តល់ឲ្យកាហ្សាក់ស្ថាននូវឱកាសក្នុងការធ្វើកំណែទម្រង់ប្រជាធិបតេយ្យប្រកបដោយអត្ថន័យ។
អង្គការនេះ បានស្នើដល់លោក Tokayev ដែលនឹងត្រូវកាន់តំណែងជាប្រធានាធិបតីកាហ្សាក់ស្ថានបណ្ដោះអាសន្ន អនុញ្ញាតឲ្យបក្សនយោបាយនានាចុះឈ្មោះ និងធ្វើយុទ្ធនាការ។ លោក Tokayev ក៏ត្រូវលើកទឹកចិត្តឲ្យអង្គការសង្គមស៊ីវិល និងប្រព័ន្ធផ្សព្វផ្សាយចូលរួមឲ្យបានសកម្មក្នុងការពង្រឹងការចូលរួមរបស់សាធារណជននៅក្នុងដំណើរកំណែទម្រង់ ក៏ដូចជាការបោះឆ្នោតប្រធានាធិបតីដែលគ្រោងនឹងធ្វើនៅឆ្នាំ២០២០។
តាមអង្គការ Freedom គណបក្សនយោបាយដែលប្រឆាំងនឹងរដ្ឋាភិបាលត្រូវបានអាជ្ញាធររារាំងមិនឲ្យធ្វើសកម្មភាព។ ចំណែកអង្គការសង្គមស៊ីវិល និង ប្រព័ន្ធផ្សព្វផ្សាយ ត្រូវទទួលរងនូវការរឹតត្បិតយ៉ាងធ្ងន់ធ្ងរ។
លោក Nazarbayev បានឡើងកាន់អំណាចជាលេខាទី១ នៃបក្សកុម្មុយនីស្តកាហ្សាក់ស្ថាននៅឆ្នាំ១៩៨៩ នៅពេលដែលតំបន់នេះស្ថិតនៅក្រោមការគ្រប់គ្រងរបស់សហភាពសូវៀត។ ចាប់តាំងពីឆ្នាំ១៩៩១ គណបក្សលោក Nazarbayev តែងតែឈ្នះរាល់ការបោះឆ្នោត ប៉ុន្តែសហគមន៍អន្តរជាតិហៅការបោះឆ្នោតទាំងនោះថា មិនមានភាពសេរី និងយុត្តិធម៌នោះទេ។
ទោះបីជាលាលែងតំណែងជាប្រធានាធិបតីក៏ដោយ ក៏លោក Nazarbayev នៅតែគ្រប់គ្រងក្រុមប្រឹក្សាសន្តិសុខជាតិ ហើយលោកនៅតែមានអំណាចក្នុងការធ្វើការសម្រេចចិត្តលើគោលនយោបាយទាំងក្នុង និងក្រៅប្រទេស។ លោក នៅតែមានអំណាចដោយសារតែលោកមានឋានៈជា «មេដឹកនាំជាតិ» ដែលជាឋានៈមួយដ៏ពិសេសដែលសភាបានផ្ដល់ឲ្យកាលពីឆ្នាំ២០១០។
កាហ្សាក់ស្ថាន ជាប្រទេសមួយស្ថិតនៅតំបន់អាស៊ីកណ្ដាលដែលសម្បូរដោយធនធានប្រេង។ ប្រទេសនេះបានប្រកាសឯករាជ្យនៅឆ្នាំ១៩៩១ បន្ទាប់ពីសហភាពសូវៀតដួលរលំ៕
