អាជ្ញាធរប្រទេសហ្វីលីពីន បានធ្វើការបង្រ្កាបលើឧក្រិដ្ឋជនគ្រឿងញៀនមួយក្រុមកាលពីម្សិលមិញដោយដកហូតបានមេតំហ្វេតាមីនចំនួន១៦០គីឡួក្រាម។
តាមការចុះផ្សាយរបស់សាព័ត៌មាន South China Morning Post ក្នុងយុទ្ធនាការបង្រ្កាបនោះសមត្ថកិច្ចហ្វីលីពីន បានចាប់ខ្លួនជនជាតិចិន៣នាក់ និងជនជាតិចិនសញ្ជាតិហ្វីលីពីនដែលជាអ្នកបកប្រែម្នាក់។ ប្រភពដដែលឲ្យដឹងថា មេតំហ្វេតាមីនចំនួន១៦០គីឡួក្រាមនោះត្រូវបានវេចខ្ចប់ដាក់ក្នុងកញ្ចប់តែ និងកំប៉ុងដាក់នំប៊ីស្គីត។ ការបង្រ្កាបនោះ ធ្វើឡើងក្នុងភូមិមួយនៅក្នុងរដ្ឋធានីម៉ានីល។
អាជ្ញាធរហ្វីលីពីន ថាក្រុមឧក្រិដ្ឋជនគ្រឿងញៀនអន្តរជាតិជាអ្នកនៅពីក្រោយមនុស្សដែលត្រូវបានចាប់ខ្លួនទាំង៤នាក់នោះ។ ប្រភពដដែលឲ្យដឹងទៀតថា គ្រឿងញៀនដែលចាប់បានកាលពីម្សិល មានតម្លៃរហូតដល់ជិត២១លានដុល្លារ។
កាលពីខែមុន សមត្ថកិច្ចហ្វីលីពីន ក៏បានធ្វើការបង្រ្កាបទៅលើក្រុមឧក្រិដ្ឋជនគ្រឿងញៀនដ៏ធំមួយនៅភាគខាងត្បូងរដ្ឋធានីម៉ានីលផងដែរ។ ពេលនោះក្រុមសមត្ថកិច្ច រឹបអូសមេតំហ្វេតាមីនដែលតម្លៃរហូតដល់៣៦លានដុល្លារ។ ក្នុងប្រតិបត្តិការណ៍នោះ ជន២នាក់ដែលជាជនជាតិចិនត្រូវបានអាជ្ញាធរប្រទេសនេះបាញ់សម្លាប់៕
