អគ្គស្នងការនគរបាលជំរុញឲ្យមន្ត្រីក្រោមបង្គាប់រឹតបន្តឹងការអនុវត្តចរាចរណ៍ផ្លូវគោក ដើម្បីបញ្ចៀសការកកស្ទះ និងគ្រោះថ្នាក់ក្នុងអំឡុងពេលបុណ្យចូលឆ្នាំថ្មីនាពេលខាងមុខ។
យោងតាមសេចក្ដីណែនាំរបស់អគ្គស្នងការនគរបាលជាតិចុះកាលពីម្សិលមិញបានឲ្យដឹងថា អគ្គស្នងការដ្ឋាននគរបាលជាតិបានចេញវិធានការ១០ចំណុច ដើម្បីរក្សាសណ្ដាប់ធ្នាប់សារធារណៈដែលក្នុងនោះមានការជំរុញឲ្យរឹតបន្តឹងការអនុវត្តចរាចរណ៍ផ្លូវគោកអំឡុងពេលចូលឆ្នាំ ដោយពិនិត្យនៅចំណុចដើមទីនៃការធ្វើចរាចរណ៍ ការដឹកលើសកំណត់ ពិនិត្យល្បឿន ជាតិស្រវឹង ដើម្បីកាត់បន្ថយការកកស្ទះ និងគ្រោះថ្នាក់។
អនុប្រធានវិទ្យាស្ថានជាតិសុវត្ថិភាពចរាចរណ៍ផ្លូវគោក លោក គង់ រតនៈបានប្រាប់សារព័ត៌មាន វីអូឌី ថា នគរបាលគួររឹតបន្តឹងឲ្យបានទៀងទាត់ និងគ្រប់កន្លែង។ លោកក៏អំពាវនាវឲ្យប្រជាពលរដ្ឋចូលរួមគោរពច្បាប់ ដើម្បីបញ្ចៀសគ្រោះថ្នាក់ផងដែរ។
យោងតាមរបាយការណ៍របស់នាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈនៃអគ្គស្នងការដ្ឋាននគរបាលជាតិ កាលពីឆ្នាំ២០១៨កន្លងទៅ គ្រោះថ្នាក់ចរាចរណ៍នៅទូទាំងប្រទេសក្នុងរយៈពេល៥ថ្ងៃគិតចាប់ពីថ្ងៃទី១៣ ដល់ទី១៧ ខែមេសា អំឡុងពេលចូលឆ្នាំថ្មីបានសម្លាប់មនុស្ស៤៧នាក់។
