រដ្ឋាភិបាលវៀតណាមបង្ហាញក្តីសង្ឃឹមថា នៅក្នុងឆមាសទី២នេះ នឹងអាចនាំចេញអង្ករទៅទីផ្សារអន្តរជាតិកើនឡើង បន្ទាប់ពីប្រទេសបញ្ជាទិញផ្សេងៗ រួមទាំងចិនផង ចុះហត្ថលេខាទិញកើនឡើងទ្វេដង។
របាយការណ៍របស់សមាគមអាហារវៀតណាម បង្ហាញថា នៅក្នុងខែមីនា ប្រទេសចំនួន៤ រួមមានអ៊ីរ៉ាក់ ម៉ាឡេស៊ី គុយប៉ា និងចិន បានចុះហត្ថលេខាបង្កើនចំនួនទិញអង្ករពីវៀតណាម។
អ៊ីរ៉ាក់បានចុះហត្ថលេខាទិញអង្ករពីវៀតណាម ចំនួន១២០ ០០០តោន ខណៈវៀតណាមរំពឹងថា ខ្លួនអាចលក់អង្ករនៅតំបន់អាស៊ីប៉ែកនិរតី ចំនួន៣០០ ០០០តោន។
ចំណែកប្រទេសម៉ាឡេស៊ីព្រមព្រៀងទិញអង្ករពីវៀតណាម ចំនួន២៥០ ០០០តោន ក្នុងនោះអង្ករបាក់ចំនួន៥ភាគរយ។
ថ្មីៗនេះនៅក្នុងដំណើរការចរចាវៀតណាមក៏ទទួលបានជ័យជម្នះក្នុងការដេញថ្លៃផ្គត់ផ្គង់ទីផ្សាររបស់ហ្វីលីពីន និងចិន គឺវៀតណាមលក់អង្ករបាក់ ក្នុង១តោន ៣៤០ដុល្លារ ខណៈឥណ្ឌាលក់៣៧០ដុល្លារ ប៉ាគីស្ថានលក់៣៦០ដុល្លារ និងថៃលក់៣៨៨ដុល្លារ ក្នុង១តោន។
សមាគមអាហារវៀតណាមក៏បង្ហាញក្តីសង្ឃឹមទៀតថា នឹងអាចនាំចេញអង្ករទៅលក់នៅប្រទេសកូរ៉េខាងត្បូងកើនឡើងតាមកូតានៃតម្លៃពន្ធពិសេស។ កាលពីឆ្នាំមុន វៀតណាមនាំអង្ករទៅលក់នៅកូរ៉េខាងត្បូងចំនួន១១៣ ០០០តោន។
បច្ចុប្បន្នវៀតណាមក៏កំពុងតែដាក់គោលដៅក្នុងការពង្រីកទីផ្សារអង្ករទៅគោលដៅសំខាន់មួយទៀត គឺប្រទេសអារ៉ាប់ប៊ី សាអ៊ូឌីត ជាប្រទេសលក្ខខណ្ឌមិនអំណោយផល ហើយពឹងផ្អែកទាំងស្រុងលើការនាំចូលអង្ករ។ កាលពីឆ្នាំមុន អារ៉ាប់ប៊ី សាអ៊ីឌីត នាំចូលអង្កររហូតដល់១,២៧លានតោន។
បច្ចុប្បន្ន ឥណ្ឌាគឺជាប្រទេសធំជាងគេក្នុងការផ្គត់ផ្គង់អង្ករឲ្យអារ៉ាប់ប៊ី សាអ៊ូឌីត រហូតដល់៧៩ភាគរយ អាមេរិក៦ភាគរយ ប៉ាគីស្ថាន៦ភាគរយ ថៃ៥ភាគរយ និងវៀតណាម២ភាគរយ។
កាលពីឆ្នាំ២០១៨ វៀតណាមនាំចេញអង្ករកើនឡើង២២ ០០០តោន ហើយនៅឆ្នាំ២០១៩នេះ សង្ឃឹមថា នឹងបង្កើនការនាំចេញឲ្យបានច្រើនជាងនេះ។