មេ​ដឹក​នាំ​តៃវ៉ាន់​បំពេញ​ទស្សនកិច្ច​នៅ​អាមេរិក ទាំង​ប្រឈម​មុខ​ជាមួយ​ចិន​

ប្រធានាធិបតីរបស់តៃវ៉ាន់ លោកស្រី សៃ អ៊ឹងវេន នឹងបំពេញទស្សនកិច្ចនៅកោះហាវ៉ៃរបស់សហរដ្ឋអាមេរិក នៅសប្តាហ៍ក្រោយ ជាផ្នែកមួយនៃទស្សនកិច្ចការទូតជាមួយប្រទេសជាមិត្តនៅតំបន់អាស៊ីប៉ាស៊ីហ្វិក។ នេះបើតាមទីភ្នាក់ងារព័ត៌មានរ៉យទ័រ។​

ចិនតែងចាត់ទុកតៃវ៉ាន់គឺជាដែនដីដ៏ល្អមួយរបស់ខ្លួនដែលបែកបាក់ក្នុងសម័យសង្គ្រាម ហើយរង់ចាំពេលវេលាក្នុងការផ្សះផ្សាជាតិឡើងវិញ។ ចិនក៏តែងតែបង្ហាញប្រតិកម្មខ្លាំងរាល់ទំនាក់ទំនងក្នុងរូបភាពណាមួយរវាងអាមេរិក​និងតៃវ៉ាន់។​

លោកស្រី សៃ អ៊ឹងវេន នឹងចុះចតនៅដែនដីកោះហាវ៉ៃ នៅថ្ងៃពុធសប្តាហ៍ក្រោយ និងបំពេញទស្សនកិច្ចនៅទីនោះ បន្ទាប់ពីលោកស្រីបំពេញទស្សនកិច្ចនៅប្រទេសជាមិត្តបីផ្សេងទៀតក្នុងរយៈ៨ថ្ងៃបានបញ្ចប់។​​ តៃវ៉ាន់កំពុងមានទំនាក់ទំនងការទូតជាមួយរដ្ឋតូចៗចំនួន១៧ នៅអាមេរិកកណ្តាល និងប៉ាស៊ីហ្វិក។​

ចិនតែងតែព្យាយាមផ្តាច់ទំនាក់ទំនងការទូតរវាងប្រទេសផ្សេងៗជាមួយកោះតៃវ៉ាន់ តាមរយៈការផ្គត់ផ្គង់សេដ្ឋកិច្ចដល់ប្រទេសតូចៗទាំងនោះ ឲ្យងាកចេញពីតៃវ៉ាន់ភ្ជាប់ទំនាក់ទំនងជាមួយចិនដីគោកវិញ។​