ក្រសួងកសិកម្ម ព្រមានដកហូតរថយន្តដែលមានស្លាកលេខក្រសួង មកទុកជាសម្បត្តិរដ្ឋ វិញ ដោយថា បើមន្ត្រីរបស់ខ្លួនយកទៅប្រើប្រាស់ក្រៅម៉ោងធ្វើការ ជាពិសេសកន្លែងសប្បាយគ្រប់ប្រភេទ។
ក្នុងសេចក្តីណែនាំរបស់ក្រសួងកសិកម្ម រុក្ខាប្រមាញ់ និងនេសាទ ចុះផ្សាយកាលពីថ្ងៃទី២១ ខែមីនាម្សិលមិញ ប្រាប់ដល់មន្ត្រីក្រសួងកសិកម្ម ត្រូវប្រើប្រាស់យានយន្តពាក់ស្លាកលេខរបស់រដ្ឋឲ្យបានត្រឹមត្រូវ ហើយបើកបរប្រកបដោយសេចក្តីថ្លៃថ្នូរ គោរពច្បាប់ស្តីពីចរាចរណ៍ផ្លូវឲ្យបានម៉ឺងម៉ាត់។
សេចក្តីណែនាំនោះ បន្តថា៖ «(មន្រ្តីរាជការក្រសួងកសិកម្ម) មិនត្រូវប្រើប្រាស់យានយន្ត ដែលមានពាក់ស្លាកលេខរដ្ឋក្រៅពីម៉ោងដែលខ្លួនត្រូវបំពេញការងារឡើយ ជាពិសេសកន្លែងសប្បាយគ្រប់ប្រភេទ រួមមាន ក្លិបកំសាន្ត កន្លែងខារ៉ាអូខេ និងកន្លែងម៉ាស្សា។ល។»
សេចក្តីណែនាំដដែលបញ្ជាក់ថា បើមន្ត្រីក្រសួងមិនធ្វើតាមការជូនដំណឹងទេ ក្រសួងនឹងយកមកវិញទាំងអស់នូវស្លាកលេខយានយន្ត ដែលបានជម្រះចេញពីបញ្ជីសារពើភណ្ឌទ្រព្យសម្បត្តិរដ្ឋ ឬត្រូវរៀបចំបែបបទប្រគល់ជូនស្ថាប័នមានសមត្ថកិច្ចគ្រប់គ្រងវិញ។
សេចក្តីជូនដំណឹងដដែលឲ្យដឹងថា មន្ត្រីក្រសួងកសិកម្ម មិនត្រូវអនុញ្ញាតឲ្យអ្នកដទៃប្រើប្រាស់យានយន្ត ដែលមានស្លាកលេខរដ្ឋ ក្នុងគោលបំណងផ្សេង ដែលមិនពាក់ព័ន្ធទៅនឹងការបំពេញភារកិច្ចរបស់ខ្លួនឡើយ ដោយថា បើមិនគោរពតាមការណែនាំទេ ក្រសួងនឹងប្តឹងស្ថាប័នមានសមត្ថកិច្ចចាត់វិធានការច្បាប់៕