សហភាពអឺរ៉ុបបានចេញសេក្ដីប្រកាសព័ត៌មានជុំវិញដំណើរទស្សនកិច្ចរបស់ក្រុមប្រតិភូអឺរ៉ុប ដែលមកបំពេញទសន្សកិច្ចនៅប្រទេសកម្ពុជា ដើម្បីជជែកពីបញ្ហាប្រព័ន្ធអនុគ្រោះពន្ធ EBA។
ប្រតិភូអឺរ៉ុបបានចាប់ផ្ដើមដំណើរទស្សនកិច្ចរយៈពេល២ថ្ងៃនៅកម្ពុជា កាលពីថ្ងៃទី២០ និង២១ ខែមីនាកន្លងទៅថ្មីៗនេះ ដោយមន្ដ្រីជាន់ខ្ពស់សហភាពអឺរ៉ុបបានជួបពិភាក្សាជាមួយរដ្ឋមន្ដ្រីក្រសួងមហាផ្ទៃ លោក ស ខេង រដ្ឋមន្ដ្រីការបរទេស លោក ប្រាក់ សុខុន និងរដ្ឋមន្ដ្រីក្រសួងពាណិជ្ជកម្ម លោក ប៉ាន សូរស័ក្ដ។
ក្នុងសេចក្ដីប្រកាសព័ត៌មានកាលពីថ្ងៃទី២២ ខែមីនា សហភាពអឺរ៉ុបគូសបញ្ជាក់ថា ដំណើរទស្សនកិច្ចរបស់ប្រតិភូអឺរ៉ុបមកកម្ពុជានេះ គឺជាឪកាសដំបូងសម្រាប់ការជជែកពិភាក្សាគ្នានៅក្នុងអំឡុងពេលត្រួតពិនិត្យ និងវាយតម្លៃ បន្ទាប់ពីសហភាពអឺរ៉ុបបានចេញសេចក្ដីប្រកាស កាលពីថ្ងៃទី ១១ ខែកុម្ភៈ អំពីការចាប់ផ្ដើមដំណើរការដែលឈានទៅព្យួរជាបណ្ដោះអាសន្ននូវប្រព័ន្ធអនុគ្រោះពន្ធ «អ្វីគ្រប់យ៉ាងលើកលែងតែអាវុធ» ពីកម្ពុជានោះ។
សហភាពអឺរ៉ុបគូសបញ្ជាក់ទៀតថា ខ្លួនបានជួបពិភាក្សាដោយស្មោះត្រង់ជាមួយភាគីកម្ពុជា និងរំពឹងថា រដ្ឋាភិបាលនឹងកែលម្អបញ្ហាទាំងអស់ដែលជាក្ដីកង្វល់ និងជម្រុញឲ្យរដ្ឋាភិបាលកម្ពុជា ចាត់វិធានការជាបន្ទាន់ ដើម្បីរក្សាប្រព័ន្ធអនុគ្រោះពន្ធ EBA របស់អឺរ៉ុបនេះ។
ប៉ុន្ដែ លោកនាយករដ្ឋមន្ដ្រី ហ៊ុន សែន បានប្រកាសជំហរនៅអំឡុងពេលដំណើរទស្សនកិច្ចរបស់ប្រតិភូអឺរ៉ុបនេះផងដែរថា កម្ពុជាមិនខ្វល់ពីការបាត់បង់ប្រព័ន្ធអនុគ្រោះពន្ធនេះនោះទេ ដោយថា ទោះមាន ឬគ្មាន ក៏កម្ពុជាមិនស្លាប់នោះដែរ៕
