មន្ត្រីទទួលបន្ទុកខាងគ្រោះមហន្តរាយរបស់កម្ពុជា បានឲ្យដឹងថា យ៉ាងហោចណាស់មនុស្ស ៣នាក់បានស្លាប់បណ្ដាលមកពីគ្រោះមហន្តរាយធម្មជាតិទូទាំងប្រទេសនាដើមឆ្នាំ២០១៩ ដោយគិតចាប់ពីខែមករា រហូតដល់ខែមីនា។
អ្នកនាំពាក្យគណៈកម្មាធិការគ្រប់គ្រងគ្រោះមហន្តរាយ លោក កែវ វី បានប្រាប់សារព័ត៌មាន វីអូឌី នៅថ្ងៃនេះថា នៅដើមឆ្នាំ២០១៩នេះ គិតចាប់ពីខែមករារហូតដល់ខែមីនា ខ្យល់កន្រ្តាក់ បានកើតឡើងចំនួន ៣៦លើក ដែលបង្កឲ្យមនុស្សរបួសចំនួន ៧នាក់ និងខូចខាតផ្ទះ ៨៨ខ្នង ហើយរន្ទះបាញ់បានសម្លាប់មនុស្ស ៣នាក់ និងបណ្ដាលឲ្យរងរបួស ៣នាក់ ព្រមទាំងងាប់គោក្របី ២ក្បាល។
មន្ត្រីរូបនេះបានឲ្យដឹងទៀតថា ចំនួនករណីខ្យល់កន្ត្រាក់បានកើនឡើងនៅដើមឆ្នាំនេះ បើធៀបនឹងតួលេខកាលពីឆ្នាំមុន ប៉ុន្តែ លោកអះអាងថា ចំនួនមនុស្សស្លាប់បានថយចុះម្នាក់ ហើយចំនួនមនុស្សរបួសថយចុះ ២នាក់។
លោក កែវ វី បានឲ្យដឹងបន្ថែមថា ចំនួនពលរដ្ឋស្លាប់ដោយសារបាតុភូតរន្ទះ ក៏បានថយចុះដែរនៅក្នុងរយៈពេល ៣ខែដើមឆ្នាំនេះ បើធៀបនឹងចំនួនមនុស្សស្លាប់ ១១នាក់ និងរបួស ៤នាក់កាលពីឆ្នាំមុន។
របាយការណ៍របស់គណៈកម្មការគ្រប់គ្រងគ្រោះមហន្តរាយកាលពីឆ្នាំមុន បានឲ្យដឹងថា មនុស្សដល់ទៅ ១១៦នាក់ បានស្លាប់ ហើយមនុស្ស ១២៦នាក់ទៀត បានរងរបួស នៅក្នុងគ្រោះថ្នាក់បណ្ដាលមកពីខ្យល់កន្ត្រាក់ចំនួន ១៩៦លើក និងបាតុភូតរន្ទះបាញ់។
ក្នុងសេចក្ដីជូនដំណឹងរបស់ខ្លួននៅថ្ងៃនេះ ក្រសួងធនធានទឹក និងឧតុនិយម ក៏បានអំពាវនាវទៅដល់ប្រជាពលរដ្ឋ ឲ្យមានការប្រុងប្រយ័ត្នចំពោះបាតុភូតផ្គររន្ទះ និងខ្យល់កន្រ្តាក់ផងដែរ៕
