អន្តរជាតិ

តើអ្វីខ្លះជាព្រឹត្តិការណ៍សំខាន់់ៗទាក់ទងនឹងការបោះឆ្នោតនៅប្រទេសថៃកាលពីម្សិលមិញ?

លោក ស៊ុន សុខេន
| ២៥ មីនា ២០១៩
ម៉ោង ១៣:៥០

បេក្ខជនតំណាងបក្សនីមួយៗរបស់ថៃ សម្រាបអាណត្តិឆ្នាំ២០១៩នេះ។ រូបភាព៖ វេបសាយបរទេស

ប្រទេសថៃ បានរៀបចំការបោះឆ្នោតជាលើកដំបូងរបស់ខ្លួនកាលពីម្សិលមិញ បន្ទាប់ពីមានរដ្ឋប្រហារទម្លាក់លោកស្រី យីងឡាក់ កាលពីឆ្នាំ២០១៤។ តើការបោះឆ្នោតនៅប្រទេសថៃកាលពីថ្ងៃអាទិត្យម្សិលមិញមានព្រឹត្តិកាណ៍សំខាន់ៗអ្វីខ្លះ?

អ្នកចេញទៅបោះឆ្នោតថយចុះ

សកម្មជនប្រឆាំងពួកយោធារបស់ថៃ បានបង្ហាញផ្ទាំងបដានៅក្នុងបាតុកម្មប្រឆាំងនឹងការពន្យារពេលនៃការបោះឆ្នោតទូទៅរបស់ប្រទេសនេះនៅទីក្រុងបាងកកនៅថ្ងៃទី 8 ខែមករាឆ្នាំ 2019 ។ រូបភាព៖ CNN

តាំងពីមានរដ្ឋប្រហារនៅឆ្នាំ២០១៤មក ប្រជាជនថៃបាននាំគ្នាធ្វើការតវ៉ាជាច្រើនលើកច្រើនសារដើម្បីជំរុញឲ្យក្រុមយោធាដែលដឹកនាំដោយលោក ប្រាយុទ្ធ ចាន់អូចា រៀបចំការបោះឆ្នោតតាមបែបប្រជាធិបតេយ្យ។ ជាលទ្ធផលការបោះឆ្នោតត្រូវបានរៀបចំកាលពីម្សិលមិញ បន្ទាប់ពីមានការរង់ចាំអស់រយៈពេល៥ឆ្នាំ។

ប៉ុន្តែ អ្វីដែលជាការចាប់អារម្មណ៍នេះ គឺចំនួនអ្នកចេញទៅបោះឆ្នោតមានតែ៦៥.៩៥ ភាគរយប៉ុណ្ណោះ។ នេះបើតាមការបញ្ជាក់របស់ប្រធានគណៈកម្មការជាតិរៀបចំការបោះឆ្នោតថៃ លោក Ittiporn Boonpracong ដែលថ្លែងក្នុងសន្និសីទសារព័ត៌មានកាលពីយប់ថ្ងៃអាទិត្យ។ កាលពីការបោះឆ្នោតឆ្នាំ២០១១ ដែលពេលនោះគណបក្សភឿថៃរបស់លោកស្រី យីងឡាក់ ឈ្នះភ្លូកទឹកភ្លូកដី ចំនួនអ្នកចេញទៅបោះឆ្នោតមានរហូតដល់៧៥.០៣ភាគរយ។

បក្សលោក ប្រាយុទ្ធ មានសម្លេងនាំមុខ

លោក Uttama Savanayana មេដឹកនាំគណបក្ស Palang Pracharat បានធ្វើសន្និសីទសារព័ត៌មានក្នុងអំឡុងពេលនៃការបោះឆ្នោតទូទៅនៅទីក្រុងបាំងកកប្រទេសថៃថ្ងៃទី 24 ខែមីនាឆ្នាំ 2019 ។ REUTERS / Soe Zeya Tun

តាមលទ្ធផលបឋមដែលគណៈកម្មការជាតិរៀបចំការបោះឆ្នោតថៃផ្តល់ឲ្យបន្ទាប់ពីរាប់សន្លឹកឆ្នោតបានជាង៩០ភាគរយ កាលពីយប់មិញ សម្លេងឆ្នោតគាំទ្រគណបក្ស Palang Pracharat របស់លោក ប្រាយុទ្ធ មានសម្លេងនាំមុខបក្សភឿថៃដែលស្និទ្ធនឹងលោក ថាក់ស៊ីន។ គណបក្ស Palang Pracharat ទទួលបាន ៧.៦៩ លានសម្លេង ខណៈបក្សភឿថៃទទួលបាន ៧.២៣ លានសម្លេង។

អ្នកនាំពាក្យបក្សភឿថៃ លោកស្រី Ladawan Wongsriwong បានថ្លែងប្រាប់ទីភ្នាក់ងារសារព័ត៌មានរ៉យទ័រថាភាពមិនប្រក្រតីមួយចំនួនបានកើតឡើង ដូចជា ការទិញដូរសន្លឹកឆ្នោតជាដើម។

លោក អាប់ភីស៊ីត លាលែងចេញពីប្រធានបក្សក្រោយបរាជ័យយ៉ាងអាម៉ាស់

មេដឹកនាំគណបក្សប្រជាធិបតេយ្យ លោក អាភីស៊ីតវេចាជីវ៉ា បានបោះឆ្នោតនៅការិយាល័យបោះឆ្នោតនៅទីក្រុងបាងកក ប្រទេសថៃកាលពីថ្ងៃអាទិត្យ ទី24 ខែមីនា ឆ្នាំ2019 ក្នុងអំឡុងពេលនៃការបោះឆ្នោតសកលជាលើកដំបូងរបស់ប្រទេស ចាប់តាំងពីយោធាបានដណ្ដើមអំណាចនៅក្នុងរដ្ឋប្រហារឆ្នាំ 2014 ។ (រូបថត AP / Wason Wanichakorn)

តាមលទ្ធផលបឋមដែលគណៈកម្មការជាតិរៀបចំការបោះឆ្នោតថៃ គណបក្សប្រជាធិបតេយ្យធ្លាក់សម្លេងគាំទ្រយ៉ាងខ្លាំង ពោលគឺគណបក្សនយោបាយដែលចាស់ជាងគេមួយនេះឈរនៅលំដាប់លេខរៀងទី៤។ លោក អាប់ភីស៊ីត ថាលោកទទួលខុសត្រូវលើរឿងនេះ ដោយការលាលែងពីតំណែងជាប្រធានបក្ស។ ទោះយ៉ាងណាក៏ដោយ អតីតនាយករដ្ឋមន្រ្តីរូបនេះ បានបង្ហាញចេតនាថាលោកចង់ចូលរួមក្នុងរដ្ឋាភិបាលចម្រុះ។

សន្លឹកឆ្នោតដែលបោះនៅណូវេលសេឡង់មិនត្រូវបានរាប់ ព្រោះមកមិនទាន់ពេល

គណៈកម្មការជាតិរៀបចំការបោះឆ្នោតថៃ បានចាត់ទុកសន្លឹកឆ្នោតចំនួន១៥០០សន្លឹក ដែលបោះដោយពលរដ្ឋថៃនៅណូវេលសេឡង់ ថាមិនបានការ។ តាមការចុះផ្សាយរបស់ការសែតបាងកកប៉ុស្តិ៍ គណៈកម្មការជាតិរៀបចំការបោះឆ្នោតថៃ បដិសេធមិនរាប់សន្លឹកឆ្នោតទាំងនោះ ព្រោះតែសន្លឹកឆ្នោតទាំងដឹកជញ្ជូនមកមិនទាន់ពេល។ សន្លឹកឆ្នោតទាំងនោះត្រូវមកឲ្យដល់មុនការិយាល័យបោះឆ្នោតបិទ ដើម្បីឲ្យគណៈកម្មការជាតិរៀបចំការបោះឆ្នោតដាក់បញ្ចូលជាមួយសន្លឹកឆ្នោតផ្សេង ការពារកុំឲ្យគេដឹងថា សន្លឹកឆ្នោតទាំងនោះបោះឲ្យបក្សណាឬបេក្ខជនណា។ តាមច្បាប់របស់ប្រទេសថៃ ពលរដ្ឋខ្លួនដែលរស់នៅបរទេសអាចធ្វើការបោះឆ្នោតមុនការបោះឆ្នោតដែលប្រព្រឹត្តទៅនៅក្នុងប្រទេស។

គណៈកម្មការជាតិរៀបចំការបោះឆ្នោតថៃ បានឲ្យដឹងថាលទ្ធបោះឆ្នោតនឹងត្រូវបាននៅរសៀលម៉ោង២នេះ៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។