អាជ្ញាធរជាតិប្រយុទ្ធប្រឆាំងគ្រឿងញៀនបានអះអាងថា សមត្ថកិច្ចកំពុងតាមចាប់មន្ត្រីរបស់ខ្លួនម្នាក់ និងអ្នកផ្សេងទៀត ដោយសង្ស័យថា អាចជាប់ពាក់ព័ន្ធក្នុងករណីគ្រឿងញៀននៅ Rock ក្នុងចំណោមជនសង្ស័យ១៥នាក់ ដែលតុលាការចេញដីកាបង្គាប់ឲ្យចាប់ខ្លួន។
អគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀន លោក មាស វីរិទ្ធ បានប្រាប់ វីអូឌី នៅថ្ងៃនេះថា ជនសង្ស័យ៤នាក់ដែលត្រូវបានចាប់ខ្លួន ពាក់ព័ន្ធនៅមជ្ឈមណ្ឌលកម្សាន្ដ Rock នេះ ត្រូវបានបញ្ជូនទៅសាលាដំបូងរាជធានីភ្នំពេញ ហើយនៅពេលនេះកំពុងស្ថិតក្រោមការសួរនាំរបស់មន្ត្រីតុលាការ។
លោក វីរិទ្ធ អះអាងថា មន្ដ្រីនគរបាលម្នាក់ដែលកំពុងតាមចាប់ខ្លួននោះ គឺឈ្មោះ ឡេង សុខគង់ ជាប្រធានផ្នែកអន្ដរាគមន៍ការិយាល័យប្រឆាំងគ្រឿងញៀននៃស្នងការដ្ឋាននគរបាលរាជធានីភ្នំពេញ ដែលពាក់ស័ក្ដិ៤។
គួររំឮកថា ម្ចាស់ក្លឹបកំសាន្តរ៉ក់ លោក ឧកញ៉ា គិត ធាង ត្រូវបានសាលាដំបូងរាជធានីភ្នំពេញ សម្រេចឃុំខ្លួនបណ្តោះអាសន្នកាលពីថ្ងៃទី១២ ខែមីនានេះ ទាន់ទិននឹងការរកឃើញគ្រឿងញៀនប្រហែល៥០គីឡូក្រាម ។
បើតាមលោក ហ៊ុន សែន អ្នករងគ្រោះដោយសារគ្រឿងញៀនបានកើនឡើងទ្វេដងគិតត្រឹមឆ្នាំ២០១៨ ដោយថា នៅឆ្នាំ២០១៧ អ្នករងគ្រោះដោយសារគ្រឿងញៀនមកព្យាបាលមាន៤ពាន់នាក់ ប៉ុន្តែ ឆ្នាំ២០១៨ ឡើងដល់៨ពាន់នាក់៕
