ប្រធានាធិបតីសហរដ្ឋអាមេរិកលោក ដូណាល់ ត្រាំ សម្រេចបំណងលោកមួយផ្នែកក្នុងការកសាងជញ្ជាំងការពារព្រំដែនជាមួយប្រទេសម៉ិចស៊ិកូ ដោយទទួលបានថវិកា១ប៊ីលានដុល្លារ ពីទីបញ្ជាការកងទ័ពមន្ទីរប៉ងតាហ្គោន។
សារនយោបាយសំខាន់មួយរបស់លោក ត្រាំ ក្នុងពេលយុទ្ធនាការឃោសនាបោះឆ្នោតគឺការសាងសង់ជញ្ជាំងការពារព្រំដែនជាមួយម៉ិចស៊ិកូ ដើម្បីទប់ស្កាត់ការចរាចរណ៍គ្រឿងញៀន ជនអន្តោរប្រវេសន៍ខុសច្បាប់ និងបទល្មើសផ្សេងៗទៀត។ ប៉ុន្តែ បំណងរបស់លោកពេលស្នើថវិកា ត្រូវបានសភាបដិសេធជាបន្តបន្ទាប់។
ទោះយ៉ាងណា ក្នុងសេចក្តីប្រកាសព័ត៌មានរបស់មន្ទីរប៉ង់តាហ្គោនថ្ងៃនេះ បញ្ជាក់ថា រដ្ឋមន្ត្រីស្តីទីនៃក្រសួងការពារជាតិ លោក ផាទ្រីក សាណាហាន បានសម្រេចឲ្យមេបញ្ជាការកងទ័ពរៀបចំកញ្ចប់ថវិកាចំនួន១ប៊ីលានដុល្លារ ប្រគល់ទៅឲ្យក្រសួងសន្តិសុខសង្គម គយ និងគ្រប់គ្រងព្រំដែន។
ក្នុងសេចក្តីប្រកាសនោះ បញ្ជាក់ថា នៅក្នុងច្បាប់សហព័ន្ធបានអនុញ្ញាតក្រសួងការពារជាតិមានសិទ្ធិក្នុងការប្រើប្រាស់ថវិកាកសាងសំណង់ឬផ្លូវ ដើម្បីទប់ស្កាត់ការជួញដូរគ្រឿងញៀនជាអន្តរជាតិឆ្លងកាត់សហរដ្ឋអាមេរិក។
ការសម្រេចនេះត្រូវគណបក្សប្រជាធិបតេយ្យចេញមុខប្រឆាំងយ៉ាងខ្លាំង។ សមាជិកសភាខាងគណបក្សប្រជាធិបតេ្យចោទថា ការសម្រេចនេះធ្វើឡើងមិនត្រឹមត្រូវ ដោយមិនបានស្នើសុំការសម្រេចពីគណៈការការពារព្រំដែន និងសភា មុនផ្ទេរលុយ។
ក្រុមសមាជិកសភាបានសរសេរនៅក្នុងលិខិតរបស់ខ្លួនថា ពួកគេប្រឆាំងដាច់ខាតចំពោះការផ្ទេរថវិកានេះ គឺធ្វើឡើងមិនបានបំពេញលក្ខខណ្ឌច្បាប់ត្រឹមត្រូវ។
ទោះយ៉ាងណា កញ្ចប់ថវិកា១ប៊ីលានដុល្លារនេះ អាចកសាងជញ្ជាំងការពារព្រំដែនបានតែ៩១គីឡូម៉ែត្រតែប៉ុណ្ណោះ សម្រាប់បំណងរបស់លោក ដូណាល់ ត្រាំ ត្រូវការថវិការហូតដល់៥,៧ប៊ីលានដុល្លារ សម្រាប់សាងសង់ជញ្ជាំងជិត៣២០០គីឡូម៉ែត្រតាមព្រំដែនជាមួយម៉ិចស៊ិកូ។
កាលពីថ្ងៃទី១៥ ខែកុម្ភៈ សភាបានបដិសេធសំណើសុំថវិកាសម្រាប់សាងសង់ជញ្ជាំងការពារព្រំដែន។ ពេលនោះ លោក ត្រាំ ប្រកាសដាក់ស្ថានភាពនៅតំបន់ព្រំដែននោះក្នុងស្ថានភាពអាសន្ន ដែលស្នើយកថវិកាកងទ័ពមកសាងសង់បាន។
ទោះយ៉ាងណា គណបក្សប្រជាធិបតេយ្យដែលគ្រប់គ្រងរដ្ឋសភាកាលពីខែមុនបានចេញសេចក្តីសម្រេចបញ្ចប់ការដាក់ស្ថានភាពអាសន្ននៅតាមព្រំដែននោះដោយមានការគាំទ្រពីសមាជិកសភាមកពីគណបក្សសាធារណរដ្ឋចំនួន១២រូបផង។ ប៉ុន្តែ លោក ត្រាំ ប្រើសិទ្ធិច្រានចោលការសម្រេចនេះ។
ពេលនេះ សភាកំពុងត្រូវការសំឡេង២ភាគ៣ គឺសំឡេងភាគច្រើនដែលមានការគាំទ្រទាំងពីរ គណបក្ស ទើបអាចរារាំងសកម្មភាពប្រធានាធិបតីលោក ដូណាល់ ត្រាំ បាន។
