ប្រមុខរដ្ឋាភិបាលប្រកាសថា ចាប់ពីឆ្នាំក្រោយទៅថ្ងៃឈប់សម្រាកនៃពិធីបុណ្យនានា នឹងត្រូវកាត់បន្ថយ ដើម្បីបង្កលក្ខណៈងាយស្រួលដល់អ្នកវិនិយោគកុំឲ្យពួកគេរត់ចេញពីកម្ពុជា។
លោកនាយករដ្ឋមន្ត្រី ហ៊ុន សែន ក្នុងពិធីចែកសញ្ញាបត្រដល់និស្សិត នៅរាជធានីភ្នំពេញ នាថ្ងៃទី២៧ ខែមីនានេះ បានថ្លែងថា នៅថ្ងៃសុក្រចុងសប្តាហ៍នេះ រដ្ឋាភិបាលនឹងប្រកាសជាកញ្ចប់នៃការធ្វើកំណែទ្រង់ ដោយថា ដើម្បីបញ្ជាក់ថា កម្ពុជាប្រឹងរស់ដោយខ្លួនឯងទោះគ្មានប្រព័ន្ធអនុគ្រោះក្រុមប្រទេសលោកសេរីក៏ដោយ។
លោក ហ៊ុន សែន បញ្ជាក់ថាអ្នកវិនិយោគគេអាចនឹងរត់ចេញពីកម្ពុជារដ្ឋាភិបាលចេះតែសុំដំឡើងប្រាក់ខែកម្មករតែទាមទារថ្ងៃឈប់ឲ្យច្រើននោះ។
លោកថា៖ «ប្រទេសយើងក្រ ក៏ប៉ុន្តែយើងឈប់សម្រាកច្រើនណាស់។ ដូច្នេះ សុំការយោគយល់អធ្យាស្រ័យ បើមិនអញ្ចឹងទេអ្នករកស៊ីទាំងអស់រត់ចោលយើងទាំងអស់ ដោយសារតែម្ខាងឡើងប្រាក់ខែ ម្ខាងទៀតឈប់សម្រាកកាន់តែច្រើន»។
មេដឹកនាំរូបនេះបង្ហើបថាក្នុងនោះក៏អាចមានការកាត់បន្ថយថ្ងៃឈប់សម្រាកផងដែរ ដែលលោកថា កម្ពុជាជាប្រទេសក្រីក្ រតែថ្ងៃឈប់សម្រាប់សម្រាប់ពិធីបុណ្យពី២៨ ទៅ៣០ថ្ងៃក្នុងមួយឆ្នាំ ដែលថាប្រទេសសិង្ហបុរី ជាប្រទេសរីកចម្រើនតែគេឈប់សម្រាកតែ១១ថ្ងៃប៉ុណ្ណោះ។
