សហរដ្ឋអាមេរិក អំពាវនាឱ្យគណៈកម្មការជាតិរៀបចំការបោះឆ្នោតថៃស៊ើបអង្កេតដោយយុត្តិធម៌ចំពោះភាពមិនប្រក្រតីនានាជុំវិញការបោះឆ្នោតដែលប្រព្រឹត្តទៅកាលពីថ្ងៃអាទិត្យកន្លងទៅ។
ការអំពាវនាវរបស់សហរដ្ឋអាមេរិក ធ្វើឡើងស្របពេលដែលមានការចោទប្រកាន់ថា មានភាពមិនប្រក្រតីជាច្រើនជុំវិញការបោះឆ្នោតនោះ។
ក្រសួងការបរទេសអាមេរិក បានលើកឡើងក្នុងសេចក្តីប្រកាសព័ត៌មានដែលចេញផ្សាយកាលពីម្សិលមិញថា ប្រទេសខ្លួនស្វាគមន៍ចំពោះការចូលរួមបោះឆ្នោតរបស់ប្រជាជនថៃ ដោយថា វាជាការបោះឆ្នោតមួយដែលពួកគេទន្ទឹងរង់ចាំអស់ពេលជាយូរ។ ប្រទេសប្រកាន់ប្រជាធិបតេយ្យមួយនេះ ហៅការបោះឆ្នោតកាលពីថ្ងៃទី២៤ ខែមីនា ឆ្នាំ២០១៩ ថាជាសញ្ញាវិជ្ជមាននៃការវិលត្រលប់មកវិញនៃរដ្ឋាភិបាលប្រជាធិបតេយ្យដែលជាការឆ្លុះបញ្ចាំងពីការចង់បានរបស់ពលរដ្ឋ។
ទោះយ៉ាងណាក៏ដោយ សហរដ្ឋអាមេរិក ក៏បានអំពាវនាវឱ្យមានការប្រកាសលទ្ធផលបោះឆ្នោតឲ្យបានឆាប់ ហើយធ្វើការស៊ើបអង្កេតដោយយុត្តិធម៌ និងប្រកបដោយតម្លាភាពទៅលើភាពមិនប្រក្រតីដែលបានរាយការណ៍។
ក្នុងសេចក្តីប្រកាសព័ត៌មានដដែល សហរដ្ឋអាមេរិក បានបញ្ជាក់ផងដែរថា ខ្លួនកំពុងរង់ចាំធ្វើការជាមួយរដ្ឋាភិបាលថៃថ្មី ដើម្បីការរីកចម្រើន ប្រជាធិបតេយ្យ និងសុខសុវត្ថិភាព របស់ប្រជាជននៃប្រទេសទាំងពីរ។
គណបក្សភឿថៃដែលត្រូវបានគេដឹងថា ជាបក្សដែលស្និទ្ធនឹងអតីតនាយករដ្ឋមន្រ្តី ថាក់ស៊ីន ស៊ីណាវ៉ាត្រា បានចោទប្រកាន់ថា ការបោះឆ្នោតកាលពីថ្ងៃអាទិត្យកន្លងទៅ មានភាពមិនប្រក្រតីជាច្រើនបានកើតឡើង។ ភាពមិនប្រក្រតីដែលបក្សនេះលើកឡើង រួមមាន ការទិញដូរសន្លឹកឆ្នោត និងចំនួនសន្លឹកឆ្នោតច្រើនជាងចំនួនអ្នកបោះឆ្នោតនៅតាមការិយាល័យខ្លះជាដើម។
ក្រៅពីនេះ ក៏មានការរិះគន់ផងដែរ ជុំវិញបញ្ហាដែលគណៈកម្មការជាតិរៀបចំការបោះឆ្នោតថៃ ចាត់ទុកសន្លឹកឆ្នោតចំនួន១៥០០សន្លឹក ដែលបោះដោយពលរដ្ឋថៃនៅណូវេលសេឡង់ ថាមិនបានការ។ គណៈកម្មការជាតិរៀបចំការបោះឆ្នោតថៃ បដិសេធមិនរាប់សន្លឹកឆ្នោតទាំងនោះ ព្រោះតែសន្លឹកឆ្នោតទាំងនោះដឹកជញ្ជូនមកមិនទាន់ពេល។
គណៈកម្មការជាតិរៀបចំការបោះឆ្នោតថៃ ថាសន្លឹកឆ្នោតទាំងនោះត្រូវមកឱ្យដល់មុនការិយាល័យបោះឆ្នោតបិទ ដើម្បីដាក់បញ្ចូលជាមួយសន្លឹកឆ្នោតផ្សេង ការពារកុំឱ្យគេដឹងថា សន្លឹកឆ្នោតទាំងនោះបោះឱ្យបក្សណាឬបេក្ខជនណា។ ប៉ុន្តែ អ្នកឃ្លាំមើលការបោះឆ្នោត និងពលរដ្ឋថៃមួយចំនួន ថាគណៈកម្មការជាតិរៀបចំការបោះឆ្នោតនៅតែអាចដាក់សន្លឹកឆ្នោតទាំងនោះចូលជាមួយសន្លឹកឆ្នោតដទៃបាន ព្រោះការរាប់មិនទាន់ត្រូវបានបញ្ចប់នៅឡើយ។
លទ្ធផលបោះឆ្នោតមិនទាន់ទាំងចេញជាផ្លូវការផង ទាំងបក្សភឿថៃ និងបក្ស Palang Pracharat របស់លោក ប្រាយុទ្ធ សុទ្ធតែប្រកាសពីជ័យជម្នះរៀងៗខ្លួន។
ដោយឡែកនៅថ្ងៃទី២៧ ខែមីនា ឆ្នាំ២០១៩ នេះ គណបក្សភឿថៃ បានចងសម្ព័នជាមួយគណបក្ស៦ផ្សេងទៀតដែលនឹងមានអាសនៈនៅក្នុងរដ្ឋសភាដើម្បីបង្កើតរដ្ឋាភិបាលចម្រុះ។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។
ប៉ុន្តែ ទោះជាយ៉ាងណាក៏ដោយ ក្រុមនេះពិបាកក្នុងការបង្កើតរដ្ឋាភិបាលដែរ ដោយសារតែនាយករដ្ឋមន្រ្តីត្រូវជ្រើសរើសតាមរយៈការបោះឆ្នោតដែលធ្វើឡើងដោយសមាជិកសភាទាំងពីរថ្នាក់ ដែលក្នុងនោះសមាជិកព្រឹទ្ធសភាទាំង២៥០ សុទ្ធតែត្រូវបានតែងតាំងដោយលោក ប្រាយុទ្ធ៕