មន្ត្រីនគរបាលបានឲ្យដឹងថា អគារ១ខ្នង និងសម្ភារមួយចំនួនរបស់រោងចក្រផលស្បែកជើងមួយកន្លែង ស្ថិតក្នុងខេត្តកំពង់ចាម ត្រូវបានអគ្គីភ័យឆាបឆេះអស់ទាំងស្រុងនៅថ្ងៃនេះ ប៉ុន្តែ គ្មានមនុស្សណាម្នាក់រងគ្រោះថ្នាក់នោះឡើយ។
អធិការនគរបាលស្រុកជើងព្រៃ លោក ប្រាក់ សុគន្ធ ប្រាប់ វី.អូឌី ថា អគាររោងចក្រផលិតស្បែកជើង ជូហ៊ួយ ដែលមានទីតាំងស្ថិតក្នុងឃុំខ្នុរដំបង ក្នុងស្រុកជើងព្រៃ ត្រូវបានភ្លើងឆាបឆេះអស់នៅម៉ោង ៧ព្រឹកថ្ងៃនេះ មុននឹងត្រូវពន្លត់បានវិញនៅម៉ោងប្រហែល ១០ព្រឹក។
មន្ត្រីនគរបាលរូបនេះ អះអាងថា គ្មាននរណាម្នាក់រងគ្រោះថ្នាក់នោះទេ ប៉ុន្តែ លោកថា មិនទាន់អាចបញ្ជាក់ពីមូលហេតុ និងទំហំនៃខូចខាតនៃរោងចក្រនោះនៅឡើយទេ ហើយថា សមត្ថកិច្ចកំពុងស្រាវជ្រាវនៅឡើយ។
អគ្គិភ័យ ៥៣៤ករណី បានកើតឡើងនៅទូទាំងប្រទេសកាលពីឆ្នាំមុន ដោយបានសម្លាប់មនុស្ស ២២នាក់ និងបណ្ដាលឲ្យមនុស្ស ៤៩នាក់ទៀតរងរបួស៕