ប្រធានាធិបតីតៃវ៉ាន់ បានទទួលស្គាល់ថា ខ្លួនពិតជាបានស្នើទិញយន្តហោះចម្បាំង និងរថក្រោះពីសហរដ្ឋអាមេរិកពិតប្រាកដមែន។
លោកស្រី Tsai Ing-wen ប្រធានាធិបតីតៃវ៉ាន់ បានអះអាងបែបនេះក្នុងពេលដែលលោកស្រីចូលដូរជើងយន្តហោះនៅកោះហាវៃរបស់អាមេរិកកាលពីម្សិលមិញ។ តាមការចុះផ្សាយរបស់ទីភ្នាក់ងារសារព័ត៌មាន AP របស់អាមេរិក ប្រធានាធិបតីតៃវ៉ាន់រូបនេះ បានស្នើទិញយន្តហោះចម្បាំងប្រភេទ F-16V និងរថក្រោះ M1 Abrams ដែលសុទ្ធតែជាអាវុធការពារខ្លួនស៊េរីទំនើបចុងក្រោយ។
ប្រធានាធិបតីតៃវ៉ាន់រូបនេះ លើកឡើងថា ប្រសិនតៃវ៉ាន់ទទួលបានអាវុធទាំងនោះ វានឹងជួយឲ្យសមត្ថភាពការពារខ្លួនកាន់តែរឹងមាំ។
បើសហរដ្ឋអាមេរិកយល់ព្រមលក់អាវុធទាំងនោះតាមការស្នើសុំរបស់តៃវ៉ាន់មែន ភាពតានតឹងថ្មីរវាងប្រទេសមហាអំណាចទាំងពីរ ចិន និងអាមេរិក នឹងកើតឡើងជាក់ជាមិនខាន៕