អ្នករាយការណ៍ឲ្យអង្គការសហប្រជាជាតិបានក្រើនរំឭកដល់រដ្ឋាភិបាលឡាវថា យុទ្ធសាស្ត្រអភិវឌ្ឍន៍សេដ្ឋកិច្ចតាមរយៈការផ្តល់ដីសម្បទានច្រើនលើសលប់ដល់ក្រុមហ៊ុនដាំដំណាំ និងធ្វើទំនប់វារីអគ្គិសនី កំពុងតែប៉ះពាល់ដល់ប្រជាជនក្រីក្រ និងក្មេងជំនាន់ក្រោយ។
អ្នករាយការណ៍ពិសេស និងអ្នកជំនាញផ្នែកសិទ្ធិមនុស្ស លោក ហ្វីលីព អាលស្តូន (Philip Alston) លើកឡើងថា ការផ្តល់ដីសម្បទានឲ្យក្រុមហ៊ុនចិនច្រើនដើម្បីយកទៅដាំដំណាំ ធ្វើទំនប់វារីអគ្គិសនី ឬធ្វើផ្លូវដែកនោះ កំពុងប៉ះពាល់ដល់អ្នកក្រីក្របច្ចុប្បន្ន និងមនុស្សជំនាន់ក្រោយទៅថ្ងៃអនាគត។
លោកបន្តថា ការផ្តល់ដីសម្បទានដែលមានការកាប់បំផ្លាញព្រៃឈើ និងបំផ្លាញធនធានធម្មជាតិផ្សេងៗច្រើននោះ បានផលតិចតួចដល់អ្នកក្រីក្រ ហើយអ្នកទទួលផលច្រើនលើសលប់នោះ គឺក្រុមអ្នកមានអំណាចទៅវិញ។
លោក ហ្វីលីព អាលស្តូន ផ្តល់យោបល់ថា សេដ្ឋកិច្ចឡាវនឹងបានប្រសើរឡើង ប្រសិនជារដ្ឋាភិបាលពង្រឹងការអប់រំចំណេះដឹងដល់ពលរដ្ឋគ្រប់គ្នា ហើយពួកគេមានការងារល្អធ្វើ។
មន្ត្រីអង្គការសហប្រជាជាតិរូបនេះបានធ្វើសន្និសីទនៅទីក្រុងវៀងចន្ទ ប្រទេសឡាវ កាលពីម្សិលមិញ បន្ទាប់ពីលោកបំពេញទស្សនកិច្ចនៅតំបន់ដាច់ស្រយាលដែលងាយរងគ្រោះ រួមទាំងកន្លែងដែលបាក់ទំនប់វារីអគ្គិសនីកាលពីឆ្នាំមុនផង។
បច្ចុប្បន្ន ចិនកំពុងតែជំរុញការអភិវឌ្ឍសំណង់ការដ្ឋានធំៗបំពេញតាមគម្រោង«ផ្លូវមួយខ្សែក្រវ៉ាត់មួយ» ក្នុងនោះមានទាំងផ្លូវរថភ្លើងតម្លៃ៧ប៊ីលានដុល្លារបច្ចុប្បន្នធ្វើហើយពាក់កណ្តាល តាមគម្រោងនឹងដាក់ឲ្យដំណើរការនៅឆ្នាំ២០២១។
អ្នករាយការណ៍ឲ្យអង្គការសហប្រជាជាតិរូបនេះលើកឡើងថា ដីសម្បទានសម្រាប់សាងសង់ និង ដាំដំណាំជាច្រើនយកដីរបស់ប្រជាពលរដ្ឋ ហើយបង្ខំឲ្យដូរទីតាំងដែលពួកគេរស់នៅ។ ពលរដ្ឋដែលរងការបណ្តេញចេញទាំងនោះទទួលបានការងារតិចតួច និងមានបំណុលច្រើន។ លោករកឃើញទៀតថា ប្រជាពលរដ្ឋក្រីក្រកំពុងតែទទួលការឈឺចាប់ពីយុទ្ធសាស្ត្រអភិវឌ្ឍរបស់រដ្ឋាភិបាលនេះ។
របាយការណ៍ពីស្ថានភាពឡាវបង្ហាញថា ប្រជាជនប្រមាណ៨០% រស់នៅដោយរកចំណូលបានតិចជាង២,៥ ដុល្លារក្នុងថ្ងៃ ហើយពួកគេជួបការប្រឈមបញ្ហាក្រីក្រដែលកំពុងរស់នៅក្នុងស្ថានភាពលំបាក។
ទោះយ៉ាងណា ក្រោយការបាក់ទំនប់វារីអគ្គិសនីកាលពីឆ្នាំ២០១៨មក ឡាវនៅតែប្តេជ្ញាបំពេញគោលដៅរបស់ខ្លួនដែលចង់ក្លាយជាកន្លែងចែកចាយអគ្គិសនីនៅអាស៊ី បើទោះជាមានការសិក្សារកឃើញថា គម្រោងទាំងនេះធ្វើឲ្យប៉ះពាល់ធ្ងន់ធ្ងរដល់បរិស្ថាន និងប្រជាពលរដ្ឋក្រីក្រក៏ដោយ។