ម្ចាស់លក់ឱសថបុរាណចិន៣នាក់ត្រូវបានសមត្ថកិច្ចឃាត់ខ្លួន ដើម្បីសាកសួរពាក់ព័ន្ធនឹងករណីលក់ផលិតផលគ្មានលិខិតអនុញ្ញាតនៅក្នុងសង្កាត់អូឫស្សីទី៤ រាជធានីភ្នំពេញ។
តាមការចុះផ្សាយរបស់ទំព័រហ្វេសប៊ុករបស់គណៈកម្មាធិការប្រយុទ្ធប្រឆាំងផលិតផលក្លែងក្លាយ នៃក្រសួងមហាផ្ទៃ បានឲ្យដឹងថា កាលពីថ្ងៃទី២៧ ខែមីនា ឆ្នាំ២០១៩ កម្លាំងសមត្ថកិច្ចបានធ្វើការឃាត់ខ្លួនម្ចាស់ហាងលក់ឱសថបុរាណចិន៣នាក់ ជាប់ពាក់ព័ន្ធលក់ និងចែកចាយឱសថគ្មានលិខិតអនុញ្ញាត នៅ៣ទីតាំង ក្នុងសង្កាត់អូឫស្សីទី៤ រាជធានីភ្នំពេញ។ សមត្ថកិច្ចក៏បានរឹបអូសផលិតផលហួសកាលបរិច្ឆេទ និងឱសថបង្កើនអារម្មណ៍ផ្លូវភេទជាច្រើនប្រភេទផ្សេងទៀត ដែលក្រសួងសុខាភិបាលហាមឃាត់។
ប្រធានលេខាធិការដ្ឋាននៃគណៈកម្មាធិការប្រយុទ្ធប្រឆាំងនឹងផលិតផលក្លែងក្លាយ លោក លីវ សុផាណារិទ្ធ បានឲ្យបញ្ជាក់បន្ថែមថា ក្រោយពីត្រួតពិនិត្យ កម្លាំងសមត្ថកិច្ចបានដកយកវត្ថុតាងមករក្សាទុក និងសាកសួរម្ចាស់ផលិតផល ដើម្បីកសាងសំណុំរឿងបញ្ជូនទៅតុលាការចាត់ការតាមនីតិវិធី។ ចំណែកហាងទាំង៣ទីតាំង បានផ្អាកការលក់ និងចែកចាយឱសថបុរាណជាបណ្តោះអាសន្ន។
ថ្លែងក្នុងពិធីកម្ទេចចោលផលិតផលក្លែងក្លាយជាង៧០តោន កាលពីដើមខែមីនា ឆ្នាំ២០១៩ រដ្ឋមន្ត្រីក្រសួងមហាផ្ទៃ លោក ស ខេង បានជំរុញឲ្យសមត្ថកិច្ចចាប់អ្នកប្រព្រឹត្តិបទល្មើសមកផ្តន្ទាទោសជាជាងរឹបអូសផលិតផលក្លែងក្លាយមកកម្ទេចចោល។ លោកថា នឹងមិនមកចូលរួមពិធីកម្ទេចចោលបន្តទៀតនោះទេ បើសិនសមត្ថកិច្ចមិនចាប់ម្ចាស់ហាងលក់លផលិតផលទាំងនោះបាន។
របាយការណ៍របស់គណៈកម្មាធិការប្រយុទ្ធប្រឆាំងផលិតផលក្លែងក្លាយ បានឱ្យដឹងថា ក្នុងរយៈពេល១២ខែ កាលពីឆ្នាំ២០១៧ ស្ថាប័ននេះបានរឹបអូសផលិតផលក្លែងក្លាយ រួមនិងគ្រឿងទេសក្លែងក្លាយខុសច្បាប់ចំនួនប្រមាណ៦០០តោន។ នៅក្នុងឆ្នាំ២០១៨ សមត្ថកិច្ចបានរឹបអូសទំនិញក្លែងក្លាយ ហើយដុតបំផ្លាញចោលជាបន្តបន្ទាប់ ដែលមានជាង២០០តោន ខណៈនៅដើម២០១៩នេះ សមត្ថកិច្ចក៏បានចុះបង្រ្កាបបានទំនិញក្លែងក្លាយរាប់រយតោនផងដែរ៕
