សាលារាជធានីភ្នំពេញ អំពាវនាវទៅប្រជាពលរដ្ឋឲ្យគោរពច្បាប់ចរាចរណ៍ និងកុំបើកបរក្រោមឥទ្ធិពលគ្រឿងស្រវឹង ដើម្បីចៀសវាងគ្រោះថ្នាក់ផ្សេងៗ ក្នុងថ្ងៃបុណ្យចូលឆ្នាំថ្មីប្រពៃណីជាតិខាងមុខនេះ។
ក្នុងសេចក្ដីជូនដំណឹងចុះថ្ងៃទី១ ខែមេសានេះ សាលារាជធានីភ្នំពេញ ឲ្យដឹងថា ក្នុងពិធីបុណ្យចូលឆ្នាំថ្មីប្រពៃណីខាងមុខនេះ ប្រជាពលរដ្ឋជាពិសេសយុវជនយុវតី សិស្ស និស្សិត និងកម្មករ កុំពិសារគ្រឿងស្រវឹងនៅពេលបើកបរ ដែលបង្កឲ្យមានគ្រោះថ្នាក់ផ្សេងៗ។
សាលារាជធានីឲ្យដឹងថា យុវជនយុវតីទាំងអស់មិនត្រូវលេងល្បែងបាញ់ទឹក ជះទឹក គប់ស្បោងទឹក លាបធ្យូង ប៉ាតម៉្សៅ ទះគក់ដោយដៃ ឬវាយដោយរំពាត់ដល់អ្នកធ្វើដំណើរ ឬជិះម៉ូតូបង្ហោះដេញគ្នាលេងនៅតាមផ្លូវ ដែលនាំឲ្យមានគ្រោះថ្នាក់ជាយថាហេតុ ប៉ះពាល់ដល់អាយុជីវិតជាដើម។
ក្រៅពីមិនអនុញ្ញាតឲ្យលេងល្បែងទាំងនេះ សាលារាជធានីក៏បានហាមប្រជាពលរដ្ឋលេងល្បែងស៊ីសង ដុតផាវ និងគ្រឿងផ្ទុះគ្រប់ប្រភេទ ដោយថា ដើម្បីរក្សាសន្តិសុខ សុវត្ថិភាព សណ្ដាប់ធ្នាប់ និងរបៀបរៀបរយសាធារណៈ។
សាលារាជធានីភ្នំពេញក៏បានណែនាំទៅអាជ្ញាធរទាំងអស់ត្រូវចាត់វិធានការផ្លូវច្បាប់ទៅលើអ្នកណាដែលធ្វើខុសពីបម្រាមខាងលើផងដែរ៕
