ប្រទេសជប៉ុននៅថ្ងៃនេះ បានប្រកាសឈ្មោះសករាជសម្រាប់ព្រះមហាក្សត្រថ្មីដែលនឹងឡើងគ្រងរាជ្យនៅដើមខែឧសភាខាងមុននេះ។
នៅព្រឹកនេះ រដ្ឋាភិបាលជប៉ុន បានប្រជុំជាមួយក្រុមអ្នកជំនាញមកពីវិស័យធុរកិច្ច សិក្សាធិការ និងប្រព័ន្ធផ្សព្វផ្សាយដើម្បីផ្លាស់ប្តូរទស្សនៈ នឹងជ្រើសរើសឈ្មោះសករាជសម្រាប់អនាគតព្រះចៅអធិរាជថ្មី។
ក្រោយការប្រជុំជាមួយអ្នកជំនាញទាំងនោះ រដ្ឋមន្រ្តីទីស្តីការគណៈរដ្ឋមន្រ្តីជប៉ុន លោក Yoshihide Suga បានប្រកាសថា ឈ្មោះសករាជថ្មីដែលគេនឹងយកមកប្រើនោះគឺ «Reiwa»។ នេះបើតាមការផ្សាយផ្ទាល់លើបណ្ដាញYou Tube របស់សារព័ត៌មាន The Japan Times ។
តាមការចុះផ្សាយរបស់សារព័ត៌មាន The Japan Time «Reiwa» មានន័យថាសំណាងល្អនិងសន្តិភាព
នៅប្រទេសជប៉ុន ឈ្មោះសករាជត្រូវបានបង្កើតឡើងនៅពេលដែលព្រះចៅអធិរាជថ្មីឡើងគ្រងរាជ្យ។ ឈ្មោះសករាជនោះ នឹងត្រូវឈប់ប្រើនៅពេលដែលមានព្រះមហាក្សត្រនោះអស់អំណាច។
ការប្រើឈ្មោះសករាជសម្រាប់ចៅអធិរាជជប៉ុន បានចាប់ផ្ដើមឡើងនៅឆ្នាំ៦៤៥។ ប្រវត្តិវិទូជឿជាក់ថា ប្រព័ន្ធនេះមានប្រភពមកពីប្រទេសចិន។ «Reiwa» ជាសករាជទី២៤៨ រាប់ចាប់តាំងសករាជ«Taika» ដែលជាសករាជដំបូងបំផុត។
តាមការចុះផ្សាយរបស់សារព័ត៌មាន The Japan Times ប្រជាជនជប៉ុនយកចិត្តទុកដាក់ខ្លាំងទៅនឹងឈ្មោះសករាជ ព្រោះថា ឈ្មោះសករាជនឹងត្រូវបានគេយកទៅប្រើលើប្រតិទិន ការសែត ហើយនិងឯកសារផ្លូវការជាច្រើនទៀត ដែលក្នុងនោះរួមមាន បណ្ណបើកបរ ជាដើម។
ការជ្រើសរើសឈ្មោះសករាជត្រូវបានរដ្ឋាភិបាលជប៉ុនធ្វើឡើងដើម្បីត្រៀមទុកសម្រាប់ចៅអធិរាជថ្មីដែលគ្រោងនឹងឡើងសោយរាជ្យបន្តពីព្រះចៅអធិរាជជប៉ុនបច្ចុប្បន្ន Akihito។ តាមគម្រោងព្រះចៅអធិរាជ Akihito នឹងដាក់រាជ្យនៅថ្ងៃទី៣០ ខែមេសា ឆ្នាំ២០១៩។
ក្រោយការដាក់រាជ្យមួយថ្ងៃបន្ទាប់ ពោលគឺថ្ងៃទី១ ខែឧសភា ឆ្នាំ២០១៩ រាជបុត្ររបស់ទ្រង់ព្រះនាម Naruhito នឹងឡើងគ្រងរាជបន្ត។ ពេលនោះហើយដែលសករាជថ្មី«Reiwa» នឹងត្រូវបានគេយកមកប្រើប្រាស់ជំនួសសករាជចាស់របស់ព្រះអធិរាជ Akihito។
សករាជសម្រាប់ព្រះចៅអធិរាជ Akihito មានឈ្មោះថា «Heisei» ដែលមានន័យថា«ការទទួលបាននូវសន្តិភាព»។ សករាជនេះត្រូវបានប្រើនៅឆ្នាំ១៩៨៩ បន្ទាប់ពីព្រះអធិរាជ Akihito ស្នងរាជ្យពីបិតាទ្រង់ព្រះចៅ Hirohito។
ក្នុងប្រវត្តិសាស្រ្តសម័យទំនើបរបស់ជប៉ុនចាប់តាំងពីបើកចំហរជើងមេឃជាមួយបរទេស ពោលគឺក្នុងសករាជពន្លឺ «Meiji» ដែលចាប់ផ្តើមឡើងនាឆ្នាំ១៨៦៨ ជប៉ុនឆ្លងកាត់សករាជបួនរួចមកហើយដែលក្នុងនោះរួមមានសករាជពន្លឺ «Meiji» សករាជ «Taisho» សករាជ «Showa» និងសករាជបច្ចប្បន្ន«Heisei»៕
