ស្រ្តីជាជនជាតិវៀតណាមដែលសង្ស័យថាជាប់ពាក់ព័ន្ធនឹងឃាតកម្មលើបងប្រុសលោក គីម ជុងអ៊ុន នឹងមានសេរីភាពវិញ ក្រោយរដ្ឋមន្រ្តីការបរទេសប្រទេសនេះបានខ្នះខ្នែងស្នើឲ្យអាជ្ញាធរម៉ាឡេស៊ីដោះលែងស្រ្តីរូបនេះ។
តុលាការម៉ាឡេស៊ីនៅថ្ងៃនេះ បានសម្រេចទម្លាក់ចោលទោសប្រហារជីវិតប្រឆាំងស្រ្តីជនជាតិវៀតណាមម្នាក់ដែលសង្ស័យជាប់ទាក់ទងនឹងករណីឃាតកម្មលើលោក គីម ជុងណាម ដែលជាបងប្រុសម្ដាយទីទៃរបស់មេដឹកកូរ៉េខាងជើង។ ប៉ុន្តែ បើតាមការចុះផ្សាយរបស់ទីភ្នាក់ងារសារព័ត៌មាន Reuters ស្រ្តីវៀតណាមម្នាក់ឈ្មោះ Doan Thi Huong នៅតែត្រូវបានតុលាការម៉ាឡេស៊ីចោទប្រកាន់ពីបទបង្ករបួសស្នាម ដែលនឹងជាប់ពន្ធគាររយៈពេលជាង៣ឆ្នាំ។
លោក គីម ជុងណាម ត្រូវបានឃាតករសម្លាប់នៅព្រលានយន្តហោះទីក្រុងកូឡាឡាំពួរ កាលពីថ្ងៃទី១៣ ខែកុម្ភៈ ឆ្នាំ២០១៧ ដោយឃាតករបានប្រើសារពុលម្យ៉ាងឈ្មោះ VX ដែលជាសារធាតុមួយដែលអង្គការសហប្រជាជាតិហាមមិនឲ្យមានការប្រើប្រាស់។
ទោះយ៉ាងណាក៏ដោយ មេធាវីការពារក្តីឲ្យស្រ្តីជនជាតិវៀតណាមរូបនេះ ប្រាប់ក្រុមអ្នកសារព័ត៌មានថា កូនក្តីរបស់ខ្លួនអាចនឹងត្រួវបានដោះលែងនៅខែក្រោយ។
រដ្ឋមន្រ្តីក្រសួងការបរទេសវៀតណាមកាលពីថ្ងៃទី១២ ខែមេសា ឆ្នាំ២០១៩ បានប្រាប់ទៅភាគីម៉ាឡេស៊ី ថា ប្រទេសខ្លួនតាមដានយ៉ាងយកចិត្តទុកដាក់ពីករណីនេះ។ រដ្ឋមន្រ្តីការបរទេសវៀតណាមរូបនេះ ក៏បានស្នើឲ្យម៉ាឡេស៊ីធ្វើការកាត់ក្តីករណីនេះដោយយុត្តិធម៌ ហើយ Doan Thi Huong គួរតែត្រូវបានដោះលែង។
ស្ត្រីជនជាតិវៀតណាម Doan Thi Huong តែងតែបដិសេធថា ខ្លួនមិនបានជាប់ទាក់ទងនឹងករណីឃាតកម្មទៅលើបងប្រុសរបស់លោក គីម ជុងអ៊ុន ឡើយ។ ស្រ្តីវៀតណាមរូបនេះ បានអះអាងថា នាងត្រូវបានគេបោកបញ្ឆោតឲ្យចូលរួមធ្វើវីដេអូលេងសើចតែប៉ុណ្ណោះ ៕
