សហរដ្ឋអាមេរិក បានប្រគល់កាណូតល្បាតចំនួន៦គ្រឿងដល់ឆ្មាំសមុទ្រវៀតណាមដែលឈរជើងក្នុងដែនសមុទ្រចិនខាងត្បូង។
យោងតាមការចុះផ្សាយលើគេហទំព័រស្ថានទូតអាមេរិកប្រចាំក្រុងហាណូយ កាណូតល្បាតចំនួន៦គ្រឿងនោះជាប្រភេទកាណូត MetalShark ស៊េរីទំនើបចុងក្រោយ មានតម្លៃប្រហែល១២លានដុល្លារ។ ពិធីប្រគល់នោះត្រូវបានធ្វើឡើងកាលពីថ្ងៃទី២៩ ខែមីនា ឆ្នាំ២០១៩ នៅទីបញ្ជាការឆ្មាំសមុទ្រភូមិភាគ៣ នៃខេត្ត Khanh Hoa។
ឆ្មាំសមុទ្រវៀតណាមតំបន់៣ ត្រួតត្រាតំបន់ឆ្នេរនៅភាគអាគ្នេយ៍ ភាគខាងត្បូងប្រទេស ក៏ដូចជាដែនទឹកនៅសមុទ្រខាងកើតដែលត្រូវបានគេស្គាល់ជាអន្តរជាតិថា ជាសមុទ្រចិនខាងត្បូង។
លោក Nguyen MinhKhanh មេបញ្ជាការរងឆ្មាំសមុទ្រភូមិភាគ៣ នៃខេត្ត KhanhHoa របស់វៀតណាម ត្រូវបានស្ថានទូតអាមេរិកដកស្រង់សម្តីមកចុះផ្សាយថា ការប្រគល់ឱ្យនូវកាណូតល្បាតទាំងនេះដល់ភូមិភាគរបស់លោក គឺជាព្រឹត្តិការណ៍ប្រវត្តិសាស្ត្រមួយដ៏សំខាន់។ លោក បន្តថា សកម្មភាពនេះក៏ជាភស្តុតាងបង្ហាញថា ទាំងអាមេរិក និងវៀតណាមកំពុងតែបន្តពង្រឹងមិត្តភាពជាមួយគ្នាថែមទៀត។
មេបញ្ជាការកងវរសេនាតូចកងទ័ពជើងទឹកអាមេរិក លោកស្រី KristenByers បានថ្លែងក្នុងពិធីនោះថា ឆ្មាំសមុទ្រវៀតណាមតំបន់៣ ជាឆ្មាំសមុទ្រយុទ្ធសាស្រ្តដ៏សំខាន់របស់វៀតណម។ លោកស្រី Kristen Byers បន្ថែមថា តំបន់នេះត្រូវការឆ្មាំសមុទ្រដែលមានជំនាញខ្ពស់ក្នុងការបើកកាណូតទំនើបផងដែរ។
បើតាមលោកស្រី Kristen Byers ក្រៅពីការប្រគល់កាណូតល្បាតទាំង៦គ្រឿងនោះ ក្នុងពេលដំណាលគ្នានោះ ភាគីអាមេរិក ក៏បានបញ្ជូនអ្នកជំនាញរបស់ខ្លួនមកជួយបង្ហាត់ពីវិធីសាស្រ្តក្នុងការប្រើប្រាស់កាណូត Metal Shark ដល់ឆ្មាំសមុទ្រវៀតណាមតំបន់៣ ទៀតផង។
កាណូតល្បាតទាំងនោះ នឹងជួយឆ្មាំសមុទ្រតំបន់៣របស់វៀតណាម ក្នុងការល្បាត និងការពង្រឹងច្បាប់នៅតាមដែនសមុទ្រ ដើម្បីប្រឆាំងនឹងការរត់ពន្ធ ការជួញដូរខុសច្បាប់ និងការប្លន់ប្រដាប់អាវុធទៅលើនាវា និងការនេសាទខុសច្បាប់ ជាដើម។
ការផ្តល់កាណូតល្បាតទាំងនោះបង្ហាញឱ្យឃើញកាន់ច្បាស់នូវកិច្ចសហប្រតិបត្តិការរវាងអាមេរិក និងវៀតណាម ក្នុងការអនុវត្តច្បាប់ដែនសមុទ្រ ការស្វែងរក និងសង្គ្រោះតាមសមុទ្រ និងប្រតិបត្តិការជំនួយមនុស្សធម៌ដែនសមុទ្ររវាងប្រទេសទាំងពីរ។
ការប្រគល់កាណូតល្បាតទាំង៦គ្រឿងនេះ ធ្វើឡើងយោងតាមកិច្ចព្រមព្រៀងនៅក្នុងអនុស្សរណៈយោគយល់គ្នាស្តីពីកិច្ចសហប្រតិបត្តិការការពារជាតិរវាងប្រទេសទាំងពីរ ដែលចុះហត្ថលេខាកាលពីខែកញ្ញា ឆ្នាំ២០១១។ កិច្ចសហប្រតិបត្តិការទាំងនោះរួមមាន ការផ្ដល់ជំនួយសន្តិសុខ និងការផ្លាស់ប្តូរការអប់រំរវាងកងទ័ពប្រទេសទាំងពីរ ជាដើម៕
