របាយការណ៍មួយ បង្ហាញថា មនុស្សជាង១០០លាននាក់ក្នុងប្រទេសចំនួន៥៣ ជុំវិញពិភពលោក នៅតែជួបប្រទះបញ្ហាអត់ឃ្លានកម្រិតខ្ពស់។
បណ្ដាញព័ត៌មានសុវត្ថិភាពចំណីអាហារ កាលពីម្សិលមិញ បានចេញផ្សាយរបាយការណ៍មួយឈ្មោះថា វិបត្តិស្បៀងអាហារលើពិភពលោក។ ក្នុងរបាយកាណ៍នោះ បណ្ដាញព័ត៌មានសុវត្ថិភាពចំណីអាហារ រកឃើញថា នៅឆ្នាំ២០១៨ មនុស្ស១១៣លាននាក់ បានជួបប្រទះនូវការអត់ឃ្លានធ្ងន់ធ្ងរ ហើយក្នុងចំណោមនោះ ជិតពីរភាគបីរស់នៅក្នុងប្រទេសចំនួន៨។ ប្រទេសទាំងនោះរួមមាន អាហ្គានីស្ថាន កុងហ្គោ អេត្យូពី នីហ្សេរីយ៉ា ស៊ូដង់ខាងត្បូង ស៊ូដង់ ស៊ីរី និងយេមែន។ ប្រភពដដែលឲ្យដឹងថា បញ្ហាអត់ឃ្លានធ្ងន់ធ្ងរនៅតែដដែល ឬ ច្រើនជាងឆ្នាំ២០១៧ ទៅទៀត ក្នុងបណ្ដាប្រទេសទាំងនេះ។
តាមរបាយការណ៍កម្រាស់ជិត២០០ទំព័ររបស់បណ្ដាញព័ត៌មានសុវត្ថិភាពចំណីអាហារដដែលគ្រាន់តែបញ្ហាអាកាសធាតុ និងគ្រោះធម្មជាតិ បានរុញឲ្យមនុស្ស២៩លាននាក់នៅប្រទេសចំនួន១៣ ធ្លាក់ចូលក្នុងស្ថានភាពអត់ឃ្លានខ្លាំង។
មូលហេតុដែលប្រជាជននៅក្នុងប្រទេសមួយចំនួននៅតែប្រឈមនឹងបញ្ហាអត់ឃ្លានកម្រិតខ្ពស់នោះ គឺដោយសារតែបម្រែបម្រួលអាកាសធាតុ បញ្ហាសេដ្ឋកិច្ច ជម្លោះប្រដាប់អាវុធ និងការចាកចេញដោយបង្ខំពីលំនៅឋាន ជាដើម។
អគ្គនាយកអង្គការស្បៀងអាហារ និងកសិកម្ម លោក Jose Graziano da Silva បានលើកឡើងថា ចំនួនអ្នកដែលអត់ឃ្លានខ្លាំងនៅមានកម្រិតមួយខ្ពស់នៅឡើយ ទោះបីតួលេខនេះមានការធ្លាក់ចុះបន្តិចបើប្រៀបធៀបនឹងឆ្នាំ២០១៧ ក៏ដោយ។ លោកបន្តថា ភាគីពាក់ព័ន្ធត្រូវភ្ជាប់គ្នារវាងវិស័យមនុស្សធម៌ អភិវឌ្ឍន៍ និងសន្តិភាព ក៏ដូចជាកសាងប្រព័ន្ធនៃភាពស៊ាំសម្រាប់មនុស្ស ដែលកំពុងជួបប្រទះជួបបញ្ហានេះ និងអ្នកដែលងាយរងគ្រោះ។
នាយកប្រតិបត្តិកម្មវិធីស្បៀងអាហាររបស់អង្គការសហប្រជាជាតិ លោក David Beasley មានប្រសាសន៍ថា ដើម្បីបញ្ចាប់ភាពអត់ឃ្លានរបស់ប្រជាជន គេត្រូវដោះស្រាយដោយចាប់ផ្ដើមពីឫសគល់នៃបញ្ហានេះ ដែលជាអាទិ៍រួមមាន ការប៉ះទង្គិចគ្នា អស្ថិរភាព និងផលប៉ះពាល់នៃការប្រែប្រួលអាកាសធាតុ ជាដើម។ លោក បន្តថា ទាំងក្មេងប្រុស ទាំងក្មេងស្រី ត្រូវតែទទួលបាននូវអាហារដែលមានសារធាតុចិញ្ចឹមគ្រប់គ្រាន់ និងការអប់រំ ស្រ្តីត្រូវមានសិទ្ធអំណាចពិតប្រាកដ ហើយជាមួយគ្នានេះ ហេដ្ឋារចនាសម្ព័ននៅទីជនបទត្រូវតែធ្វើឲ្យប្រសើរឡើងផងដែរ។
នាយកប្រតិបត្តិកម្មវិធីស្បៀងអាហាររបស់អង្គការសហប្រជាជាតិរូបនេះ បន្ថែមទៀតថា រឿងដែលសំខាន់មួយទៀតដែលត្រូវធ្វើនោះ គឺការចូលរួមរបស់មេដឹកនាំពិភពលោកក្នុងការបញ្ចាប់ជម្លោះនានា។ លោក ស្នើមេដឹកនាំទាំងអស់ដែលមានអរិភាពនឹងគ្នា ត្រលប់ចូលតុចរចា ហើយដោះស្រាយបញ្ចប់វិវាទនៅពេលនេះ។
ទោះយ៉ាងណាក៏ដោយ តាមរបាយការណ៍របស់បណ្ដាញព័ត៌មានសុវត្ថិភាពចំណីអាហារមនុស្សដែលជួបប្រទះភាពអត់ឃ្លានធ្ងន់ធ្ងរនៅឆ្នាំ២០១៨ មានការថយចុះបើប្រៀបធៀបទៅនឹងឆ្នាំ២០១៧ ដែលមានរហូត១២៤លាននាក់៕