លោកនាយករដ្ឋមន្ត្រី ហ៊ុន សែន ស្តីបន្ទោសក្រសួង៣ ថា បានរុញការងារឲ្យគ្នាទៅវិញទៅមកករណីធ្វើទំនប់ចំនួន២ នៅខេត្តកំពត ដើម្បីការពារកុំឲ្យទឹកសមុទ្រហូរចូលទឹកសាប។
ក្នុងពិធីសម្ពោធឲ្យដំណើរការប្រព័ន្ធផ្គត់ផ្គង់ទឹកស្អាតនៅខេត្តកំពតថ្ងៃអង្គារម្សិលមិញ លោក ហ៊ុន សែន ថ្លែងថា មកដល់ពេលនេះគម្រោងធ្វើទំនប់បង្ហៀរ ដែលស្ថិតក្នុងគម្រោងវារីអគ្គិសនីកំចាយ ទាំងទំនប់ទី១ និងទី២ មិនទាន់ត្រូវបានសាងសង់នៅឡើយទេ។
លោក ហ៊ុន សែន ថ្លែងទៀតថា ក្រសួងឧស្សាហកម្ម និងសិប្បកម្ម ក្រសួងបរិស្ថាន និងក្រសួងរ៉ែ និងថាមពល កំពុងច្រានការទទួលខុសត្រូវដាក់គ្នាទៅវិញទៅមក។
មេដឹកនាំរូបនេះ បញ្ជាទៅទេសរដ្ឋមន្ត្រីក្រសួងឧស្សាហកម្ម និងសប្បកម្ម លោក ចម ប្រសិទ្ធិ ត្រូវដឹកនាំជាបន្ទាន់ដើម្បីស្វែងរកដំណោះស្រាយ ដោយថា មិនត្រូវធ្វើឲ្យខូចមុខមាត់ ដោយសារតែពួកគេមិនបានបំពេញកាតព្វកិច្ចនេះទេ។
លោក ថា៖ «ឯកឧត្តមទេសរដ្ឋមន្ត្រី ចម ប្រសិទ្ធ ត្រឡប់ទៅវិញដឹកនាំការប្រជុំភ្លាម ដើម្បីថាអ្នកណាត្រូវទទួលបន្ទុកធ្វើ។ តើក្រសួងឧស្សាហកម្ម ឬក្រសួងបរិស្ថានធ្វើឲ្យច្បាស់នៅកន្លែងហ្នឹង។ ហើយប្រសិនអ្នកទាំងពីរមិនត្រូវគ្នា ខ្ញុំអនុញ្ញាតឲ្យក្រសួងឧស្សាហកម្ម និងសិប្បកម្មធ្វើផ្ទាល់ដោយយកក្រសួងធនធានទឹកមកធ្វើតែម្តង»។
បើតាមលោកនាយករដ្ឋមន្ត្រី ហ៊ុន សែន បើទំបនប់បង្ហៀរពីរនេះ មិនត្រូវបានសាងសង់ទេ ពលរដ្ឋនៅខេត្តកំពតនឹងប្រឈមកង្វះទឹកសាបប្រើប្រាស់ ព្រោះថាពេលនេះ ពេលទឹកសមុទ្រជោរឡើង វាបានហូរចូលទឹកព្រែកជាទឹកសាប ហើយពេលទឹកសមុទ្រស្រកទើបទឹកសាបហូរចូលព្រែកវិញ ៕
