សាលារាជធានីគំរាមប្រើវិធានការរដ្ឋបាល ទៅលើស្ថាប័នវិស័យឯកជនទាំងឡាយណា ដែលនៅតែបន្តបិទផ្ទាំងផ្សាយពាណិជ្ជកម្មរបស់ខ្លួននៅតាមបង្គោលភ្លើង និងទីសាធាណៈផ្សេងទៀត ដោយថា ដើម្បីលើកកម្ពស់សោភ័ណភាពក្រុង និងសណ្តាប់ធ្នាប់សង្គម។
សេចក្តីជូនដំណឹងចុះថ្ងៃទី២ ខែមេសា ម្សិលមិញនេះ សាលារាជធានីលើកឡើងថា បច្ចុប្បន្ន វិស័យឯកជនមួយចំនួនមានទាំងវិទ្យាស្ថានអប់រំ អង្គការ សមាគម ធនាគារ និងស្ថាប័នមីក្រូហិរញ្ញវត្ថុជាដើម កំពុងធ្វើសកម្មភាពចុះបិទស្ទីកឃ័រ ចងបដាផ្សព្វផ្សាយពីអាជីវកម្ម សេវាកម្ម ផលិតផល នៅតាមបង្គោលភ្លើង បង្គោលចរាចរណ៍ ដើមឈើ របងអាគារសាធារណៈ ចែកខិតប័ណ្ណ តាមភ្លើងស្តុប ជាដើម ដែលថា ធ្វើឲ្យប៉ះពាល់ដល់សោភ័ណភាពក្រុង កិត្យានុពលភាពជាតិ សណ្តាប់ធ្លាប់សង្គម។
ស្ថាប័នរដ្ឋមួយនេះព្រមានថា ក្នុងករណីមិនអនុវត្តតាមការណែនាំ « រដ្ឋបាលរាជធានីភ្នំពេញនឹងចាត់វិធានការចុះរុះរើដោយមិនទទួលខុសត្រូវរាល់ការខូចខាតឡើយ ហើយនឹងប្រមូលវត្ថុតាងទាំអស់ ដើម្បីរៀបចំនីតិវិធីចាត់ការទៅតាមផ្លូវច្បាប់»។
សាលារាជធានី អំពាវនាវឲ្យវិស័យឯកជនទាំងអស់ត្រូវបញ្ឈប់ជាបន្ទាន់ និងត្រូវបកយកប័ណ្ណព័ត៌មានដែលបានបិទផ្សព្វផ្សាយទាំងនោះចេញវិញ។