ប្រមុខរដ្ឋាភិបាល អំពាវនាវទៅអាជីវករ ម្ចាស់សណ្ឋាគារ និងផ្ទះសំណាក់នៅខេត្តព្រះសីហនុកុំឲ្យតម្លើងថ្លៃសេវានៅថ្ងៃបុណ្យចូលឆ្នាំប្រពៃណីខ្មែរខាងមុខនេះ។
លោកនាយករដ្ឋមន្រ្តី ហ៊ុន សែន បានសរសេរលើទំព័រហ្វេសប៊ុករបស់លោក កាលពីម្សិលមិញថា ខេត្តព្រះសីហនុសព្វថ្ងៃកំពុងទាក់ទាញភ្ញៀវទេសចរណ៍យ៉ាងច្រើនទាំងភ្ញៀវជាតិ និងអន្តរជាតិ។ បើតាមលោក ហ៊ុន សែន ខេត្តព្រះសីហនុនឹងមានរៀបចំសង្រ្កាន្តសមុទ្រ ចាប់ពីថ្ងៃទី១៤ ដល់ថ្ងៃទី ១៦ ខែមេសា ដើម្បីអបអរសាទរពិធីបុណ្យចូលឆ្នាំថ្មី។ លោក បានស្នើដល់អាជីវករ ជាពិសេសម្ចាស់ផ្ទះសំណាក់ និងសណ្ឋាគារ កុំតម្លើងថ្លៃ ដើម្បីឲ្យពលរដ្ឋមានឱកាសបានមកស្នាក់នៅកម្សាន្ត និងប្រើប្រាស់សេវាកម្មនៅទីនោះបានដូចធម្មតា។
យោងតាមរបាយការណ៍ចុះទី២៤ ខែមករា ឆ្នាំ២០១៨ ផ្ញើទៅរដ្ឋមន្ដ្រីក្រសួងមហាផ្ទៃនោះ អភិបាលខេត្តព្រះសីហនុ លោក យន្ដ មីន បានឲ្យដឹងថា ក្នុងឆ្នាំ២០១៧ ជនបរទេសចូលមកស្នាក់នៅក្នុងខេត្តព្រះសីហនុ មានចំនួន ៦ ៣៨៥នាក់ ក្នុងនោះ ជនជាតិចិនមានច្រើនជាងគេ គឺ ៤ ៤៩៨នាក់ ឥណ្ឌូណេស៊ី មាន៩០៩នាក់ ហ្វីលីពីន ១២៧នាក់ ម៉ាឡេស៊ី ១២២នាក់ និងជនជាតិផ្សេងៗទៀត៕
