រដ្ឋាភិបាលសម្រេចបញ្ចេញរថយន្ដចំនួន ១២០គ្រឿងសម្រាប់ដឹកជញ្ជូនប្រជាពលរដ្ឋដោយមិនគិតកម្រៃសេវាអំឡុងពិធីបុណ្យចូលឆ្នាំថ្មីប្រពៃណីជាតិខាងមុខនេះ។
ក្នុងសេចក្ដីជូនដំណឹងចុះថ្ងៃទី៥ ខែមេសា ឆ្នាំ២០១៩ អភិបាលនៃគណៈអភិបាលរាជធានីភ្នំពេញ លោក ឃួង ស្រេង បានឲ្យដឹងថា រដ្ឋបាលរាជធានីភ្នំពេញបានរៀបចំរថយន្ដចំនួន ១២០គ្រឿង សម្រាប់ដឹកជញ្ជូនប្រជាពលរដ្ឋដែលចង់ធ្វើដំណើរទៅកាន់ស្រុកកំណើតនៅឪកាសបុណ្យចូលឆ្នាំប្រពៃណីខ្មែរខាងមុខ។
ក្នុងសេចក្ដីជូនដំណឹង រដ្ឋបាលរាជធានីភ្នំពេញឲ្យដឹងថា ការដឹកជញ្ជូនប្រជាពលរដ្ឋនេះ គឺធ្វើឡើងដោយឥតគិតថ្លៃ និងមានរយៈពេល ៧ថ្ងៃ ចាប់ពីថ្ងៃទី១២ រហូតដល់ថ្ងៃទី១៨ ខែមេសា។
បើតាមសេចក្ដីជូនដំណឹងដដែលនេះ រថយន្តក្រុងសាធារណៈទាំង ១២០គ្រឿង នឹងត្រូវដាក់ពង្រាយឲ្យដឹកជញ្ជូនពលរដ្ឋទៅកាន់ខេត្តនានាស្ថិតនៅតាមផ្លូវជាតិលេខ១ រហូតដល់ផ្លូវជាតិលេខ៨ នៅទូទាំងប្រទេស។
រដ្ឋាភិបាលកម្ពុជាបានសម្រេចដាក់ពង្រាយរថយន្តក្រុងសាធារណៈសម្រាប់ដឹកជញ្ជូនប្រជាពលរដ្ឋដោយឥតគិតថ្លៃសម្រាប់ពិធីបុណ្យជាតិធំៗ ចាប់តាំងពីពិធីបុណ្យចូលឆ្នាំថ្មីប្រពៃណីជាតិកាលពីឆ្នាំ២០១៨មក៕
