ប្រទេសស្រីលង្កា កាលពីថ្ងៃចន្ទ បានបើកដំណើរការផ្លូវរថភ្លើងល្បឿនជំហានទី១ ដែលប្រើប្រាស់ប្រាក់កម្ចីក្រោមគម្រោងគំនិតផ្តួចផ្តើម «ខ្សែក្រវ៉ាត់ និងផ្លូវ» របស់ចិន។
ផ្លូវរថភ្លើងនេះ មានប្រវែងជិត២៧គីឡូម៉ែត្រដែលតភ្ជាប់ទីក្រុង Matara ទៅក្រុង Beliatta ហើយវាក៏ជាផ្លូវរថភ្លើងល្បឿនលឿនទី១របស់ស្រីលង្កា ចាប់តាំងពីប្រទេសនេះទទួលបានឯករាជ្យពីចក្រភពអង់គ្លេសនៅឆ្នាំ១៩៤៨។ តាមការចុះផ្សាយរបស់សារព័ត៌មាន Business Today របស់ឥណ្ឌា គម្រោងនេះត្រូវបានសាងសង់ដោយមានការសហការគ្នារវាងក្រុមហ៊ុនចិន និងក្រុមហ៊ុនរដ្ឋស្រីលង្កា។
តាមការចុះផ្សាយរបស់ព្រឹត្តិបត្រ Railway Gazette គម្រោងផ្លូវរថភ្លើងល្បឿនលឿនដែលកសាងក្នុងដំណាក់កាលទី១នេះ ចាប់ផ្ដើមសាងសង់នៅឆ្នាំ២០១៣ ដោយចំណាយអស់ប្រាក់២៧៨លានដុល្លារ ដែលជាកម្ចីពីធនាគារចិន Export-Import Bank of China ។ ប្រភពដដែលនេះ ឲ្យដឹងថា កម្ចីនេះត្រូវសងត្រលប់វិញក្នុងរយៈពេល២០ឆ្នាំ។
តាម Railway Gazette រដ្ឋាភិបាលស្រីលង្កាបានដាក់រថភ្លើងដឹកអ្នកដំណើរចំនួន៧ សម្រាប់ផ្លូវនីមួយៗក្នុងមួយថ្ងៃ។ រថភ្លើងទាំងនោះអាចរត់បានក្នុងល្បឿន១២០គីឡូម៉ែត្រក្នុងមួយម៉ោង។
អ្នកជំនាញកិច្ចការអន្តរជាតិ និងសារព័ត៌មានដែលមាននិន្នាការទៅលោកខាងលិចមួយចំនួនតែងតែលើកឡើងថា ការផ្ដល់ប្រាក់កម្ចីរបស់ចិនដល់ប្រទេសមួយចំនួនមានលក្ខណៈជាអន្ទាក់បំណុល។ ជាក់ស្តែង អ្នកនិពន្ធសៀវភៅដែលនិយាយពីទំនាក់ទំនងចិន និងអាមេរិក លោក ចន ប៉ុមហ្រ្វេដ និយាយថា គម្រោង «ខ្សែក្រវ៉ាត់ និងផ្លូវ» ដែលចិនបានបង្កើតឡើងនៅឆ្នាំ២០១៣ មានលក្ខណៈជាអន្ទាក់បំណុលបែបការទូត នៅពេលប្រទេសដែលជាកូនបំណុលមិនមានលទ្ធភាពសងបំណុល ចិននឹងឲ្យប្រទេសទាំងនោះធ្វើតាមអ្វីដែលខ្លួនចង់បានជាក់ជាមិនខាន។
ទោះយ៉ាងណាក៏ដោយ អ្នកនាំពាក្យក្រសួងការបរទេសចិន លោក លូ ខាង បានថ្លែងកាលពីថ្ងៃទី៩ ខែមេសា ឆ្នាំ២០១៩ ថាផ្លូវរថភ្លើងល្បឿនជំហានទី១នៅភាគខាងត្បូងប្រទេសស្រីលង្កា ជាគម្រោងដែលត្រូវបានអនុវត្តដោយក្រុមហ៊ុនចិនមួយ ក្រោមគំនិតផ្ដួចផ្តើម «ខ្សែក្រវ៉ាត់ និងផ្លូវ» នឹងជួយឲ្យការដឹកជញ្ជូនរបស់ប្រជាជនស្រីលង្កាដែលរស់នៅភាគខាងត្បូងកាន់តែមានភាពងាយស្រួល ក៏ដូចជា ធ្វើឲ្យសេដ្ឋកិច្ចក្នុងតំបន់នោះមានការអភិវឌ្ឍផងដែរ។
លោក លូ ខាង បន្ថែមថា ប្រជាជនស្រីលង្កាពិតជាសប្បាយរីករាយដែលមានផ្លូវរថភ្លើងល្បឿននេះ ហើយចិនក៏ត្រេកអរជាមួយនឹងពលរដ្ឋប្រទេសនេះផងដែរ។
អ្នកនាំពាក្យក្រសួងការបរទេសចិនរូបនេះ បន្តថា ចិនត្រៀមខ្លួនជាស្រេចក្នុងការពង្រីកកិច្ចសហប្រតិបត្តិនានាជាមួយស្រីលង្កា ក្រោមគំនិតផ្តួចផ្តើម «ខ្សែក្រវ៉ាត់ និងផ្លូវ» ដើម្បីនាំមកនូវផលប្រយោជន៍ជាក់ស្តែងបន្ថែមទៀតដល់ពលរដ្ឋប្រទេសដែនកោះមួយនេះ។
តាមការចុះផ្សាយរបស់សារព័ត៌មាន Business Today របស់ឥណ្ឌា ចិនជាប្រទេសដែលផ្ដល់កម្ចីច្រើនជាងគេឲ្យប្រទេសស្រីលង្កា។ ប្រភពដដែល ឲ្យដឹងថា ទំហំសាច់ប្រាក់វិនិយោគរបស់ចិននៅដែនកោះមួយនេះ មានប្រមាណជា៨ពាន់លានដុល្លារ។ កាលពីចុងឆ្នាំ២០១៧ ដោយសារតែមិនមានលទ្ធភាពសងបំណុល ស្រីលង្កាបានសម្រេចចិត្តប្រគល់កំពង់ផែយុទ្ធសាស្ត្រ Hambantota របស់ខ្លួនទៅឲ្យចិនគ្រប់គ្រងរយៈពេលរហូតដល់៩៩ឆ្នាំ៕
