ក្រុមហ៊ុន Google និងApple បានទទួលសំណើរបស់រដ្ឋាភិបាលឥណ្ឌា ដោយសម្រេចដកចេញនូវកម្មវិធីចែកចាយវីដេអូរបស់ចិនឈ្មោះថា Tik Tok ដែលមានន័យថា ប្រជាជនឥណ្ឌាមិនអាចទាញយកកម្មវិធីនេះបានតទៅទៀតនោះទេ។
Tik Tok ជាកម្មវិធីចែកចាយវីដេអូមួយដែលបង្កើតឡើងដោយក្រុមហ៊ុនបច្ចេកវិទ្យាចិន Beijing ByteDance Technology។ កម្មវិធីនេះ ត្រូវបានដាក់ឲ្យប្រើប្រាស់ជាដំបូងនៅប្រទេសចិននាខែកញ្ញា ឆ្នាំ២០១៦។ មួយឆ្នាំក្រោយមក Tik Tok ត្រូវបានដាក់ឲ្យប្រជាជននៅប្រទេសផ្សេងៗទៀតទាញយកប្រើប្រាស់តាមរយៈ Google Play និង App Store។ Tik Tok អនុញ្ញាតឲ្យអ្នកប្រើប្រាស់បង្កើតវិដេអូខ្លីៗរយៈពេលប្រហែល១៥វិនាទី ដោយធ្វើត្រាប់តាមបទចម្រៀង ឬភាពយន្តនានា។
តាមការចុះផ្សាយរបស់សារព័ត៌មាន BBC ការសម្រេចរបស់ក្រុមហ៊ុនក្រុមហ៊ុន Google និង Apple ធ្វើឡើងក្រោយពីតុលាការក្នុងរដ្ឋ Tamil Nadu របស់ឥណ្ឌា បានស្នើសុំឲ្យក្រុមហ៊ុនទាំងពីររាំងខ្ទប់កម្មវិធីនេះនៅក្នុងប្រទេសរបស់ខ្លួនកាលពីថ្ងៃទី៣ ខែមេសា កន្លងទៅ។
តំណាងក្រុមហ៊ុន Google បានឆ្លើយប្រាប់អ្នកយកព័ត៌មាន Reuters ថាក្រុមហ៊ុនខ្លួនគោរពលើច្បាប់ក្នុងស្រុករបស់ប្រទេសនីមួយ។ ដោយឡែក តំណាងក្រុម Apple បានបដិសេធមិនឆ្លើយបំភ្លឺជុំវិញករណីនេះទេ។
ទោះយ៉ាងណាក៏ដោយ ឥណ្ឌាមិនបានរាំងខ្ទប់កម្មវិធី Tik Tok ចំពោះអ្នកដែលកំពុងប្រើប្រាស់នោះទេ។
ប៉ុន្តែ តុលាការជាន់ខ្ពស់នៅ Tamil Nadu កាលពីថ្ងៃអង្គារ បានស្នើទៅតុលាការសហព័ន្ធរារាំងខ្ទប់កម្មវិធី Tik Tok ដោយថា កម្មវិធីនេះត្រូវបានប្រើដើម្បីចែកចាយសកម្មភាពអាសអាភាស ហើយវាក៏អាចត្រូវបានក្រុមមនុស្សមួយចំនួនប្រើប្រាស់ដើម្បីកេងចំណេញផ្លូវភេទលើកុមារផងដែរ។ តុលាការសហព័ន្ធឥណ្ឌា នៅថ្ងៃទី២២ ខែមេសា នឹងធ្វើការសម្រេចចិត្តលើការស្នើសុំនេះ។
តាមតំណាងក្រុមហ៊ុនបច្ចេកវិទ្យាចិន ByteDance បច្ចុប្បន្នកម្មវិធី Tik Tok មានអ្នកប្រើប្រាស់ប្រហែល៥០០លាននាក់ នៅជុំវិញពិភពលោក ដែលក្នុងនោះពលរដ្ឋឥណ្ឌាប្រមាណ១២០លាននាក់កំពុងប្រើប្រាស់កម្មវិធីនេះ។ ByteDance ជឿជាក់ថា នៅតុលាការសហព័ន្ធឥណ្ឌានៅសប្តាហ៍ក្រោយនឹងធ្វើការសម្រេចចិត្តមួយប្រកបដោយយុត្តិធម៌។
ប្រទេសបង់ក្លាដេស កាលពីខែកុម្ភៈកន្លងទៅ ក៏បានខ្ទប់មិនឲ្យប្រជាជនខ្លួនប្រើប្រាស់កម្មវិធី Tik Tok នេះ ក្រោមហេតុផលស្រដៀងគ្នានឹងអ្វីដែលឥណ្ឌាបានលើកឡើងផងដែរ។
កាលពីខែកុម្ភៈកន្លងទៅ ByteDance បានយល់ព្រមបង់ពិន័យឲ្យគណៈកម្មការពាណិជ្ជកម្មសហព័ន្ធអាមេរិកចំនួនជិត៦លានដុល្លារ ក្រោយពីអាមេរិកចោទក្រុមហ៊ុននេះ បានប្រមូល និងបង្ហាញពីទីតាំងរបស់កុមារដែលប្រើប្រាស់កម្មវិធី Tik Tok និងមិនបានលុបព័ត៌មានទាំងនោះនៅពេលដែលមានការស្នើសុំ៕