រដ្ឋមន្ដ្រីក្រសួងមហាផ្ទៃ លោក ស ខេង អនុញ្ញាតឲ្យអតីតតំណាងរាស្រ្តគណបក្សសង្គ្រោះជាតិមួយរូបដែលទើបទទួលបានសិទ្ធិធ្វើនយោបាយ បង្កើតគណបក្សថ្មីជាផ្លូវការ។
ក្នុងលិខិតចុះថ្ងៃទី២៣ ខែមេសា ឆ្នាំ២០១៩នេះ រដ្ឋមន្ដ្រីក្រសួងមហាផ្ទៃ លោក ស ខេង បានសម្រេចអនុញ្ញាតឲ្យអតីតសមាជិកគណៈកម្មាធិការនាយក និងជាអតីតតំណាងរាស្ដ្រមណ្ឌលស្វាយរៀងរបស់គណបក្សសង្គ្រោះជាតិ លោក រៀល ខេមរិន្រ្ទ បង្កើតគណបក្សថ្មីជាផ្លូវការ ដែលឈ្មោះថា «គណបក្សខ្មែរអភិរក្សនិយម»។
ការអនុញ្ញាតឲ្យលោក រៀល ខេមរិន្ទ្រ បង្កើតគណបក្សថ្មីនេះ គឺបន្ទាប់ពីក្រសួងមហាផ្ទៃបានជំទាស់ម្ដងរួចមកហើយទៅនឹងឈ្មោះគណបក្សនេះ ដោយលោក រៀល ខេមរិន្ទ្រ បានស្នើដាក់ឈ្មោះគណបក្សថា «គណបក្សចក្រភពខ្មែរ»។ ក្នុងលិខិតកាលពីថ្ងៃទី២៦ ខែមីនា លោក ស ខេង លើកឡើងក្រោមហេតុផលថា ការស្នើសុំបង្កើតគណបក្សដែលមានឈ្មោះ «ចក្រភពខ្មែរ» គឺមិនអាចទទួលយកបានទេ ដោយសារវាជាអតីតឈ្មោះប្រវត្តិសាស្ដ្ររបស់ប្រទេសកម្ពុជា។
លោក រៀល ខេមរិន្ទ្រ គឺជាមនុស្សម្នាក់ក្នុងចំណោមអតីតមន្ដ្រីគណបក្សសង្គ្រោះជាតិ ៩រូប ដែលបានស្នើសុំ និងទទួលបានសិទ្ធិនយោបាយឡើងវិញ បន្ទាប់ពីគណបក្សសង្គ្រោះជាតិត្រូវបានតុលាការកំពូលរំលាយចោល កាលពីខែវិច្ឆិកា ឆ្នាំ២០១៧ ហើយអតីតមន្ដ្រីបក្សប្រឆាំង ១១៨រូប ត្រូវបានគេហាមឃាត់មិនឲ្យធ្វើនយោបាយនោះ៕
