គ្រោះធម្មជាតិខ្យល់កន្ត្រាក់ ធ្វើឲ្យប៉ះពាល់ផ្ទះប្រជាពលរដ្ឋរហូតដល់ជាង ៦០០ខ្នង ក្នុងរយៈពេលតែ២ថ្ងៃប៉ុណ្ណោះ នៅខេត្តបាត់ដំបង និងខេត្តបន្ទាយមានជ័យ ។
រដ្ឋមន្ត្រីក្រសួងមហាផ្ទៃ លោក ស ខេង បានសរសេរលើទំព័រហ្វេសប៊ុករបស់លោកនៅរសៀលថ្ងៃនេះ ថា គ្រោះខ្យល់កន្ត្រាក់ បានបណ្ដាលឲ្យប៉ះពាល់ផ្ទះប្រជាពលរដ្ឋចំនួន ៣២៩ ខ្នង ក្នុងរយៈពេល២ថ្ងៃ គឺថ្ងៃទី២១ និងថ្ងៃទី២២ ខែមេសា ឆ្នាំ ២០១៩។ ករណីនេះកើតឡើងក្នុងស្រុកក្រុងចំនួន ៧ រួមមាន ក្រុងបាត់ដំបង ស្រុកបាណន់ មោងឬស្សី គាស់ក្រឡ រតនមណ្ឌល ថ្មគោល និងស្រុកសង្កែ។
បើតាមការចុះផ្សាយរបស់អគ្គស្នងការនគរបាលជាតិ ខ្យល់កន្ត្រាក់ ក៏បានវាយប្រហារខេត្តបន្ទាយមានជ័យផងដែរក្នុងរយៈពេល២ថ្ងៃដូចគ្នា។ គ្រោះធម្មជាតិនេះ បានបណ្ដាលឲ្យប៉ះពាល់ផ្ទះពលរដ្ឋចំនួន ៣០៣ខ្នង និងខូចខាតធ្ងន់ធ្ងរ ២២ខ្នង។ ដោយឡែក ខ្យល់កន្រ្តាក់ដែលកើតឡើងកាលពីថ្ងៃទី២១ ខែមេសា បានបណ្តាលឲ្យមនុស្សស្លាប់ ០២នាក់។ ប្រភពដដែលឲ្យដឹងថា ករណីនេះកើតឡើងក្នុងស្រុក៨ រួមមាន ស្រុកអូរជ្រៅ ភ្នំស្រុក មង្គលបុរី ថ្មពួក ស្វាយចេក ព្រនេត្រព្រះ ប៉ោយប៉ែត និងក្រុងសិរីសោភ័ណ្ឌ។
អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ លោក កែវ វី បានប្រាប់ វី.អូ.ឌី ឲ្យដឹងថា ពីដើមឆ្នាំ២០១៩ រហូតមកដល់ថ្ងៃទី២១ ខែមេសា ឆ្នាំ២០១៩ ករណីខ្យល់កន្រ្តាក់បានកើតឡើង ៨៣លើក នៅរាជធានីខេត្តចំនួន ២៣ លើកលែងខេត្តកំពត និងត្បូងឃ្មុំ។ បើតាមប្រភពដដែល គ្រោះធម្មជាតិទាំង ៨៣លើកនេះ បានប៉ះពាល់ផ្ទះពលរដ្ឋ ២៣០០ខ្នង។