អ្នករាយការណ៍ពិសេសអង្គការសហប្រជាជាតិ លោកស្រី រ៉ូណា ស្មីត ក្នុងដំណើរមកកម្ពុជាដើម្បីឃ្លាំមើលពីបញ្ហាសិទ្ធិមនុស្សលើកនេះ សុំជួបអតីតមេដឹកនាំបក្សប្រឆាំង លោក កឹម សុខា ជាថ្មីទៀត ខណៈមេដឹកនាំរូបនេះ មិនទាន់មានសេរីភាពនៅឡើយ។
លោកស្រី រ៉ូណា ស្មីត ប្រាប់ VOD ថា តាមសារអេឡិចត្រូនិច កាលពីថ្ងៃព្រហស្បតិ៍ ថា លោកស្រីបានស្នើទៅរដ្ឋាភិបាលរួចហើយ ពីគម្រោងចូលជួបលោក កឹម សុខា។ លោកស្រី រ៉ូណា ស្មីត បញ្ជាក់ទៀតថា សំណើសុំជួបនេះ លោកស្រីបារម្ភពីចំណាត់ការបន្តឃុំខ្លួនបណ្តោះអាសន្ន និងការចោទប្រកាន់លើលោក កឹម សុខា។
អ្នកនាំពាក្យក្រសួងយុត្តិធម៌កម្ពុជា លោក គឹម សន្តិភាព អះអាងថា ជាប់រវល់ មិនអាចសុំបញ្ចាក់បាន។
លោក កឹម សុខា ត្រូវតុលាការបង្គាប់ឲ្យឃុំខ្លួនជាង១៩ខែមកហើយ គិតត្រឹមខែមេសានេះ ដោយចោទអតីតមេបក្សប្រឆាំងរូបនេះថា បានឃុបឃិតជាមួយបរទេសចង់ផ្តួលរំលំរដ្ឋាភិបាល។
ប៉ុន្តែ សហរដ្ឋអាមេរិក បានហៅលោក កឹម សុខា ថាជាមនុស្សស្អាតស្អំ ត្រូវបានឃុំខ្លួនទាំងអយុត្តិធម៌ និងទាមទារឲ្យទម្លាក់បទចោទដោយគ្មានលក្ខខណ្ឌ។
តាមសេចក្តីប្រកាសព័ត៌មាន ដំណើរទស្សនកិច្ចមកកម្ពុជារបស់លោកស្រី រ៉ូណា ស្មីត មានរយៈពេល១១ថ្ងៃ ចាប់ពីថ្ងៃទី២៩ ខែមេសានេះ ដល់ថ្ងៃទី៩ ខែឧសភា។ ក្នុងដំណើរទស្សនកិច្ចនេះ លោកស្រី រ៉ូណា ស្មីត ផ្ដោតលើបញ្ហាសិទ្ធិមនុស្ស បញ្ហាជម្លោះដីធ្លី រួមទាំងគោលដៅអភិវឌ្ឍន៍ប្រកបដោយចីរភាព (SDGs)។
រយៈពេល១១ថ្ងៃនេះ អ្នករាយការណ៍ពិសេសរូបនេះ គ្រោងជួបមន្ដ្រីជាន់ខ្ពស់រដ្ឋាភិបាល តំណាងអង្គការសង្គមស៊ីវិល និងតំណាងស្ថានទូតមួយចំនួនប្រចាំកម្ពុជា។ ក្នុងដំណើរទស្សនកិច្ចមកកាន់កម្ពុជាឆ្នាំមុន លោក ស្រី រ៉ូណា ស្មីត បានស្នើសុំជួបលោក កឹម សុខា ម្តងដែរ តែរដ្ឋាភិបាលច្រានចោល៕
