ប្រធានាធិបតីចិន បានថ្លែងថា «គំនិតផ្តួចផ្តើមខ្សែក្រវ៉ាត់ និងផ្លូវ» នឹងផ្តោតលើការគ្រប់គ្រងប្រកបដោយតម្លាភាព និងលុបបំបាត់ឲ្យបាននូវអំពើពុករលួយនានា។ នេះបើតាមការចុះផ្សាយរបស់បណ្តាញទូរទស្សន៍ SBS របស់អូស្រ្តាលី។
លោក ស៊ី ជិនពីង បានថ្លែងបែបនេះក្នុងវេទិកា «គំនិតផ្តួចផ្តើមខ្សែក្រវ៉ាត់ និងផ្លូវ» នៅចំពោះមុខប្រមុខរដ្ឋជាង៤០ និងតំណាងប្រទេសជាង១០០ នាទីក្រុងប៉េកាំងនៅថ្ងៃនេះ។
លោក បានលើកឡើងថា ក្រុមហ៊ុន និងភាគីពាក់ព័ន្ធនានាដែលទទួលគម្រោងនានាជាផ្នែកមួយក្នុង «គំនិតផ្ដួចផ្ដើមខ្សែក្រវ៉ាត់ និងផ្លូវ» ត្រូវតែមានតម្លាភាព និងភាពស្មោះត្រង់ក្នុងការអនុវត្តកិច្ចសន្យារបស់ខ្លួន។
ការលើកឡើងរបស់ប្រធានាធិបតីចិនរូបនេះ ត្រូវបានគេមើលឃើញផងដែរថា ធ្វើឡើងដើម្បីជាការឆ្លើយតបទៅនឹងការចោទប្រកាន់ដែលថាគម្រោងធំៗដែលរដ្ឋាភិបាលក្រុងប៉េកាំងផ្តល់ជំនួយ និងកម្ចី បានបង្កើតអំពើពុករលួយក្នុងប្រទេសមួយចំនួន៕
