ប្រជាពលរដ្ឋហុងកុងរាប់ពាន់នាក់កាលពីថ្ងៃអាទិត្យម្សិលមិញ បាននាំគ្នាធ្វើការតវ៉ាប្រឆាំងនឹងសេចក្តីស្នើច្បាប់ក្នុងការបញ្ជូនអ្នកទោសពីតំបន់ស្វយ័តមួយនេះទៅឲ្យតុលាការក្រុងប៉េកាំងធ្វើការកាត់ក្តី។
តាមការចុះផ្សាយរបស់សារព័ត៌មាន South China Morning Post អង្គការ Civil Human Rights Front ដែលធ្វើការផ្តោតលើបញ្ហានយោបាយ និងជីវភាពរស់នៅរបស់ពលរដ្ឋហុងកុង ជាអ្នករៀបចំបាតុកម្មនេះ។ Civil Human Rights Front ថាអ្នកចូលរួមបាតុកម្មកាលពីម្សិលមិញមានរហូតដល់ជាង១៣ម៉ឺននាក់។ ប៉ុន្តែ សមត្ថកិច្ចដែនកោះមួយនេះ ថាបាតុករមានតែជាង២ម៉ឺននាក់ប៉ុណ្ណោះ។
Civil Human Rights Front និងក្រុមបាតុករ លើកឡើងថា សេចក្តីស្នើច្បាប់នេះបានបំផ្លាញសិទ្ធិ និងសេរីភាពជាមូលដ្ឋានរបស់ពលរដ្ឋហុងកុងដែលបានធានាក្រោយពីអង់គ្លេសបានប្រគល់កោះនេះឲ្យទៅចិនវិញនៅឆ្នាំ១៩៩៧។
ក្រុមបាតុករដែលចូលរួមការតវ៉ាកាលពីម្សិលមិញ បានលើកឡើងស្រដៀងគ្នាថា មូលហេតុដែលពួកគេប្រឆាំងនឹងសេចក្តីព្រៀងច្បាប់នេះ ដោយសារតែពួកគេមិនមានជំនឿចិត្តនឹងតុលាការក្រុងប៉េកាំង។ ពួកគេ ក៏បារម្ភផងដែរថា ភាគីចិនអាចនឹងយកច្បាប់ថ្មីនេះដើម្បីប្រើលើសកម្មជននយោបាយនានាដែលប្រឆាំងនឹងរដ្ឋាភិបាលក្រុងប៉េកាំង។
ក្រុមបាតុករ បានស្រែកទាមទារឲ្យរដ្ឋាភិបាលហុងកុងទម្លាក់សេចក្តីព្រៀងច្បាប់នេះចោលជាបន្ទាន់ ហើយគំរាមបន្តធ្វើការតវ៉ាទៀត បើរដ្ឋាភិបាលខ្លួននៅតែបន្តធ្វើវា។
បាតុករម្នាក់ បាននិយាយជាមួយសារព័ត៌មាន រ៉យទ័រ ថា ក្រោមច្បាប់នេះ ទោះបីពលរដ្ឋហុងកុងមិនបានទៅចិនដីគោកក៏ដោយ ប៉ុន្តែ បើរដ្ឋាភិបាលក្រុងប៉េកាំងចង់ចាប់ខ្លួនគេ វានឹងមិនពិបាកនោះទេ។ លោកបន្តថា រឿងដែលគួរឲ្យខ្លាចបំផុតសម្រាប់លោកនោះ គឺរដ្ឋាភិបាលក្រុងប៉េកាំងអាចលាក់ខ្លួនពលរដ្ឋ ដោយមិនចាំបាច់រកឃើញបទល្មើសណាមួយនោះទេ។
ក្រុមបាតុករ ក៏បានទាមទារឲ្យលោកស្រី Carrie Lam មេដឹកនាំតំបន់ស្វយ័តហុងកុងចុះចេញពីតំណែងផងដែរ ដោយពួកគេចោទថា មេដឹកនាំរូបនេះកំពុងក្បត់ពលរដ្ឋហុងកុង។
ទោះជាយ៉ាងក៏ដោយ មន្រ្តីជាន់ខ្ពស់ក្រុងហុងកុងបានទាត់ចោលការលើកឡើងរបស់ក្រុមបាតុករ។ អគ្គលេខាធិការរដ្ឋបាលតំបន់ស្វយ័តហុងកុង លោក Matthew Cheung បានច្រានចោលពីការបារម្ភនានារបស់ក្រុមសិទ្ធិមនុស្ស និងបាតុករ។ លោក បញ្ជាក់ជាមួយសារព័ត៌មាន South China Morning Post ថាការបញ្ជូនអ្នកទោសនឹងត្រូវធ្វើឡើងដោយមានការពិនិត្យយ៉ាងម៉ត់ចត់ ហើយករណីណាដែលទាក់ទងនឹងបញ្ហាសិទ្ធិ នយោបាយ និងទោសប្រហារជីវិតនឹងមិនអនុវត្តនោះទេ៕