រដ្ឋមន្រ្តីក្រសួងការបរទេសរុស្ស៊ី ជាថ្មីម្តងទៀត បានទទូចឲ្យសហរដ្ឋអាមេរិក និងប្រទេសជាសម្ព័ន្ធមិត្ត បោះបង់ចោលនូវគម្រោងទម្លាក់មេដឹកនាំវេណេស៊ុយអេឡា លោក នីកូឡាស ម៉ាឌូរ៉ូ ចេញពីតំណែង។
លោក Sergey Lavrov រដ្ឋមន្រ្តីក្រសួងការបរទេសរុស្ស៊ី បានថ្លែងបែបនេះជាមួយក្រុមអ្នកសារព័ត៌មានមុនពេលលោកជួបជជែកពិភាក្សានឹងរដ្ឋមន្រ្តីក្រសួងការបរទេសវេណេស៊ុយអេឡា លោក Jorge Arreaza កាលពីម្សិលមិញ។
រដ្ឋមន្រ្តីក្រសួងការបរទេសរុស្ស៊ីរូបនេះ បានលើកឡើងថា រុស្ស៊ីកំពុងមើលឃើញដោយផ្ទាល់ភ្នែកថា សហរដ្ឋអាមេរិកជាអ្នកដឹកមុខក្នុងការធ្វើយុទ្ធនាការទម្លាក់លោក នីកូឡាស ម៉ាឌូរ៉ូ ដែលជាប្រធានាធិបតីស្របច្បាប់របស់វេណេស៊ុយអេឡាចេញពីតំណែង។ លោក បានបន្តថា រុស្ស៊ីថ្កោលទោសនូវសកម្មភាពទាំងនេះ ដោយថា វាបានរំលោភច្បាប់អន្តរជាតិដែលមានចែងក្នុងធម្មនុញ្ញអង្គការសហប្រជាជាតិយ៉ាងធ្ងន់ធ្ងរ។
លោក Sergey Lavrov ក៏បានលើកឡើងផងដែរថា កិច្ចខិតខំប្រឹងប្រែងណាមួយក្នុងការផ្តួលរំលំរដ្ឋាភិបាលរបស់លោក នីកូឡាស ម៉ាឌូរ៉ូ មិនបានជួយអ្វីសោះដល់ដំណើរការប្រជាធិបតេយ្យ តែវាកាន់តែបំផ្លាញដល់ការដោះស្រាយបញ្ចប់វិបត្តិនយោបាយនៅក្នុងប្រទេសវេណេស៊ុយអេឡាទៅវិញទេ។ លោក បន្ថែមថា មានតែប្រជាពលរដ្ឋវេណេស៊ុយអេឡាខ្លួនឯងប៉ុណ្ណោះដែលមានសិទ្ធិសម្រេចពីជោគវាសនារបស់ប្រទេសខ្លួន។
លោក Sergey Lavrov បានប្រកាសបញ្ជាក់ជំហរជាថ្មីទៀតថា រដ្ឋាភិបាលក្រុងមូស្គូ នៅតែគាំទ្ររដ្ឋាភិបាលរបស់លោក នីកូឡាស ម៉ាឌូរ៉ូ។ រដ្ឋមន្រ្តីក្រសួងការបរទេសរុស្ស៊ីរូបនេះ មានប្រសាសន៍ថាប្រទេសរបស់លោកមិនដែលជ្រៀតជ្រែកកិច្ចការផ្ទៃក្នុងប្រទេសណាមួយនោះទេ តែផ្ទុយទៅវិញតែងតែជំរុញឲ្យប្រទេសផ្សេងៗគោរពច្បាប់អន្តរជាតិ។
រដ្ឋាភិបាលក្រុងមូស្គូ តាមរយៈរដ្ឋមន្រ្តីការបរទេសរបស់ខ្លួន ក៏បានឲ្យដឹងថា រុស្ស៊ីត្រៀមជាស្រេចក្នុងការជជែកជាមួយភាគីពាក់ព័ន្ធ ដើម្បីស្វែងរកដំណោះស្រាយបញ្ចប់វិបត្តិនយោបាយនៅវេណេស៊ុយអេឡា។
ក្នុងបទសម្ភាសន៍ជាមួយសារព័ត៌មាន BBC របស់អង់គ្លេសកាលពីម្សិលមិញ មេដឹកនាំបក្សប្រឆាំង លោក Juan Guaido បានបញ្ជាក់ថា លោកកំពុងវាយតម្លៃពីជម្រើសនានាក្នុងការបណ្តេញលោក នីកូឡាស ម៉ាឌូរ៉ូ ចេញពីតំណែង។ លោកថា លោកក៏ពិចារណាពីការស្នើសុំអន្តរាគមន៍យោធាពីអាមេរិកផងដែរ។
មេដឹកនាំបក្សប្រឆាំងដែលប្រកាសខ្លួនឯងជាប្រធានាធិបតីវេណេស៊ុយអេឡារូបនេះ បានបង្ហាញជំហរបែបនេះ ក្រោយពីក្រុមលោកបរាជ័យក្នុងការធ្វើរដ្ឋប្រហារទម្លាក់លោក ម៉ាឌូរ៉ូ កាលពីថ្ងៃអង្គារសប្តាហ៍មុន។
កាលពីថ្ងៃអាទិត្យម្សិលមិញ រដ្ឋមន្រ្តីក្រសួងការបរទេសអាមេរិក លោក Mike Pompeo បានបញ្ជាក់ជាមួយសារព័ត៌មាន ABC ថា សហរដ្ឋអាមេរិកនឹងនៅជាប់ជានិច្ចជាមួយ លោក Juan Guaido។ រដ្ឋមន្រ្តីក្រសួងការបរទេសអាមេរិករូបនេះ បន្តថា អាមេរិកមានជម្រើសច្រើនយ៉ាងក្នុងការជំរុញឲ្យលោក នីកូឡាស ម៉ាឌូរ៉ូ ចេញពីអំណាច។ លោក បន្ថែមថា ជម្រើសទាំងនោះរួមមាន សម្ពាធ ផ្នែកការទូត នយោបាយ ហើយនិងជម្រើសចុងក្រោយគឺការប្រើប្រាស់កម្លាំងយោធា។
ស្ថានភាពនយោបាយនៅក្នុងប្រទេសវេណេស៊ុយឡា កាន់តែមានតានតឹងបន្ទាប់ពីមេដឹកនាំបក្សប្រឆាំងលោក Juan Guaido បានប្រកាសខ្លួនជាប្រធានាធិបតីវេណេស៊ុយអេឡាបណ្ដោះអាសន្នកាលពីចុងខែមករា។ សហរដ្ឋអាមេរិក និងប្រទេសជាសម្ព័ន្ធមិត្តរបស់ខ្លួនជាង៥០ បានប្រកាសទទួលស្គាល់លោក Juan Guaido ជាបន្តបន្ទាប់។ ប៉ុន្តែ រុស្ស៊ី ចិន និងប្រទេសដែលជាគ្នីគ្នាប្រទេសទាំងពីរនេះ នៅតែទទួលស្គាល់លោក នីកូឡាស ម៉ាឌូរ៉ូ ជាប្រធានាធិបតីវេណេស៊ុយអេឡាដដែល៕
