រដ្ឋាភិបាលមីយ៉ាន់ម៉ា សម្រេចដោះលែងអ្នកសារព័ត៌មានរ៉យទ័រ២រូប ក្រោយពេលឃុំខ្លួនអស់៥១១ថ្ងៃ ដែលការដោះលែងនេះទទួលបានការស្វាគមន៍ច្រើនពីសហគមន៍អន្តរជាតិ។
អ្នកសារព័ត៌មានទាំងពីររូបនោះគឺម្នាក់ឈ្មោះ Wa Lone អាយុ៣៣ឆ្នាំ និងលោក Kyaw Soe Oo អាយុ២៩ឆ្នាំ ត្រូវសមត្ថកិច្ចមីយ៉ាន់ម៉ាឃាត់ខ្លួនកាលពីខែធ្នូ ឆ្នាំ២០១៧ ដោយចោទថា ធ្វើឱ្យប៉ះពាល់ដល់កិច្ចការសម្ងាត់របស់ជាតិ ហើយបញ្ជូនទៅពន្ធនាគារ Insein។
អ្នកសារព័ត៌មានទាំងពីររូបដើរចេញពីពន្ធនាគារនៅព្រឹកថ្ងៃអង្គារនេះ ក្រោមការលើកលែងទោស ជាមួយអ្នកទោស ៦ ៥២០នាក់ ដែលប្រធានាធិបតី Win Myint សម្រេចលើកលែងកាលពីពិធីបុណ្យចូលឆ្នាំក្នុងពាក់កណ្តាលខែមេសាកន្លងទៅ។ នេះបើតាមការចុះផ្សាយរបស់ទីភ្នាក់ងារព័ត៌មានរ៉យទ័រ។
បន្ទាប់ពីចេញពីពន្ធនាគារលោក Wa Lone ថ្លែងថា លោកពិតជាមានការសប្បាយរីករាយខ្លាំងណាស់ ដែលបានជួបគ្រួសារ និងក្រុមការងាររបស់លោកឡើងវិញ។ លោកបញ្ជាក់ថា លោកមិនអាចរង់ចាំបន្តទៀតបានទេ គឺលោកត្រូវទៅកន្លែងការងារ ហើយបន្តការងារទៀត ព្រោះលោកគឺជាអ្នកសារព័ត៌មាន។
និពន្ធនាយកសារព័ត៌មានរ៉យទ័រ លោក Stephen J Adler ថ្លែងថា លោកពិតជាមានការសប្បាយរីករាយយ៉ាងខ្លាំង ហើយថា ការដោះលែងនេះបង្ហាញពីសេរីភាពសារព័ត៌មាននៅមីយ៉ាន់មានភាពប្រសើរឡើងដែលពិភពលោកកំពុងតែរង់ចាំ។
ការម្រេចរបស់ប្រធានាធិបតីមីយ៉ាន់ម៉ាធ្វើឡើង បន្ទាប់ពីការឃុំខ្លួនអ្នកសារព័ត៌មានរ៉យទ័រទាំងពីររូបនេះ ហើយសហគមន៍អន្តរជាតិបានដាក់សម្ពាធជំរុញឱ្យមានការដោះលែង។
តុលាការកំពូលរបស់មីយ៉ាន់ម៉ាធ្លាប់បានបដិសេធបណ្តឹងរបស់អ្នកទាំងពីរ។ នៅមានភាពមិនច្បាស់លាស់ពីមូលហេតុដែលការដោះលែងអ្នកទាំងពីរនេះទេ។
ទោះយ៉ាងណា ការដោះលែងនេះធ្វើឡើងស្របពេលដែលមន្ត្រីការទូត និងអង្គការអន្តរជាតិកំពុងបំពេញការងារនៅក្នុងប្រទេសមីយ៉ាន់ម៉ា ពិភាក្សាជាមួយរដ្ឋាភិបាលនៃប្រទេសនេះពីបញ្ហាស្ថានភាពជនជាតិភាគតិច រ៉ូហ៊ីងយ៉ា។
អនុប្រធានអង្គការឃ្លាំមើលសិទ្ធិមនុស្សអន្តរជាតិប្រចាំតំបន់អាស៊ី លោក Phil Robertson ថ្លែងថា លោកចូលរួមអបអរចំពោះ Wa Lone និង Kyaw Soe Oo ដែលបានដើរចេញពីការឃុំឃាំង ហើយបានជួបជុំគ្រួសារធម្មតាវិញ។ លោកបន្តថា អ្នកសារព័ត៌មានស៊ើបអង្កេតមិនគួរនឹងមានការចាប់ខ្លួននោះទេ ។
Wa Lone និង Kyaw Soe Oo គឺជាជនជាតិមីយ៉ាន់ម៉ា ហើយក៏ជាអ្នកសារព័ត៌មានរបស់សារព័ត៌មានរ៉យទ័រ។ ការចាប់ខ្លួននេះកើតឡើងក្នុងអំឡុងពេលដែលអ្នកទាំងពីរកំពុងតែសរសេរសារព័ត៌មានស៊ើបអង្កេតពីស្ថានភាពការសម្លាប់ និងបណ្តេញចេញជនជាតិភាគតិច រ៉ូហ៊ីងយ៉ា។
ការិយាល័យអង្គការសហប្រជាជាតិប្រចាំនៅក្នុងប្រទេសមីយ៉ាន់ម៉ា បានចេញសេចក្តីថ្លែងការណ៍ថា ស្វាគមន៍ការដោះលែង Wa Lone និង Kyaw Soe Oo។ អង្គការសហប្រជាជាតិចាត់ទុកថា ការដោះលែងនេះ គឺជាដំណើរការប្រសើរឡើងនៃសេរីភាពសារព័ត៌មាន និងជាសញ្ញាដែលរដ្ឋាភិបាលខិតខំប្រឹងប្រែងផ្លាស់ប្តូរទៅរករបបលទ្ធិប្រជាធិបតេយ្យពិតប្រាកដ។