សាលារាជធានីភ្នំពេញ ណែនាំទៅម្ចាស់អាជីវកម្មទាំងអស់ដែលកំពុងប្រើប្រាស់ខ្សែកាប៍្លអាកាសនៅតាមបណ្ដោលផ្លូវចំនួន១៧ ប្រញាប់រុះរើខ្សែកាប៍្លចេញក្នុងរយៈពេល១៥ ថ្ងៃដោយគិតចាប់ពីថ្ងៃទី៧ ខែឧសភា តទៅ។
ក្នុងសេចក្ដីជូនដំណឹងរបស់សាលារាជធានីភ្នំពេញចេញផ្សាយកាលពីម្សិលមិញ ឱ្យដឹងថា ដើម្បីលើកកម្ពស់សោភ័ណភាពទីក្រុងភ្នំពេញឱ្យកាន់តែល្អប្រសើរនោះ ក្រុមការងារចម្រុះរបស់សាលារាជធានីនឹងធ្វើការរៀបចំសណ្ដាប់ធ្នាប់បណ្ដាញខ្សែកាប្លិ៍អាកាសលើផ្លូវចំនួន ១៧។
ក្នុងនោះ មានវីថីព្រះអង្គឌួង (១១០) វិថីព្រះស៊ីសុវត្ថិ មហាវិថីសម្ដេចសុធារស មហាវិថីព្រះមុនីរ៉េត (២១៧) មហាវិថីយោធលខេមរភូមិន្ធ (ផ្លូវលេខ២៧១) ផ្លូវ ២០០៤ ផ្លូវចោមចៅ មហាវិថីមិត្តភាពភ្នំពេញ-ហាណូយ (១០១៩) ជាដើម។
ករណីនេះ សាលារាជធានីភ្នំពេញអំពាវនាវឱ្យប្រជាពលរដ្ឋ ម្ចាស់អាជីវកម្ម អង្គការ និងបណ្ដាក្រុមហ៊ុនឯកជនទាំងអស់ដែលកំពុងប្រើប្រាស់បណ្ដាញខ្សែកាប្លិ៍អាកាស ត្រូវប្រញាប់រួសរាន់រៀបចំរុះរើខ្សែកាប្លិ៍ ចេញក្នុងរយៈពេល១៥ថ្ងៃ ចាប់ពីថ្ងៃទី៧ ខែឧសភា ឆ្នាំ២០១៩ នេះតទៅ។
