លោក ហ៊ុន សែន ប្តូរអភិបាលខេត្តបន្ទាយមានជ័យ

លោកនាយករដ្ឋមន្ត្រី ហ៊ុន សែន ស្នើទៅព្រះមហាក្សត្រផ្ទេរតួនាទីរបស់អភិបាលខេត្តបន្ទាយមានជ័យ លោក សួន បវរ ឱ្យទទួលការងារផ្សេង ហើយតែងតាំងអភិបាលរង១រូបនៃខេត្តនេះជាអភិបាលខេត្តវិញ។

លិខិតលោកនាយករដ្ឋមន្ត្រីទូលថ្វាយព្រះមហាក្សត្រនៅថ្ងៃនេះ បានស្នើសុំផ្ទេរលោក សួន បវរ ពីអភិបាលខេត្តបន្ទាយមានជ័យ ឱ្យបម្រើការងារនៅក្រសួងមហាផ្ទៃ ដើម្បីទទួលភារកិច្ចថ្មី។ លោកក៏បានស្នើតែងតាំងលោក អ៊ុំ រាត្រី ជាអភិបាលរងខេត្តនេះ ឱ្យកាន់តួនាទីជាអភិបាលខេត្តវិញ។​

ក្នុងលិខិតរបស់លោកនាយករដ្ឋមន្ត្រីមិនបានបញ្ជាក់ថា លោក សួន បវរ មានចំណុចខ្សោយអ្វីបានជាផ្លាស់ប្តូរនោះទេ គ្រាន់តែបញ្ជាក់ថា ការផ្លាស់ប្តូរនេះដើម្បីឱ្យការងារមានភាពប្រសើរឡើង។​​ ​