រដ្ឋាភិបាលម៉ាឡេស៊ី កាលពីថ្ងៃអង្គារ បានប្តឹងរឹបអូសទ្រព្យសម្បត្តិរបស់អតីតនាយករដ្ឋមន្រ្តី លោក ណាជីប រ៉ាហ្សាក់ និងភរិយា ដែលមានតម្លៃរហូតដល់២៣៤លានដុល្លារ។
តាមការចុះផ្សាយរបស់សារព័ត៌មាន The Straitstimes រដ្ឋាភិបាល និងនគរបាលម៉ាឡេស៊ី បានប្តឹងលោក ណាជីប រ៉ាហ្សាក់ និងភរិយា ថាពួកគេទាំងពីរបានយកប្រាក់ពីគម្រោង 1 Malaysia Development Berhad (1MDB) ដើម្បីទិញសម្ភារប្រើប្រាស់ផ្ទាល់ខ្លួន។ សម្ភារទាំងនោះរួមមាន គ្រឿងអលង្ការ លុយសុទ្ធ កាបូប និងរថយន្តដែលមានតម្លៃថ្លៃៗ។
1 Malaysia Development Berhad ជាគម្រោងដែលបង្កើតឡើងដោយនាយករដ្ឋមន្រ្តី ណាជីប រ៉ាហ្សាក់ កាលពីឆ្នាំ២០០៩ ក្នុងគោលបំណងទាក់ទាញអ្នកវិនិយោគបរទេសឲ្យបណ្ដាក់ទុនរកស៊ីនៅម៉ាឡេស៊ី។ ប៉ុន្តែ គម្រោងនេះ ត្រូវបានគេរិះគន់ថា ហ៊ុមព័ទ្ធដោយអំពើពុករលួយ។ គណៈកម្មាធិការរដ្ឋសភាម៉ាឡេស៊ី បានរកឃើញថាមានភាពមិនប្រក្រតីជាច្រើនទាក់ទងនឹងប្រតិបត្តិការសាច់ប្រាក់ជាង៤ពាន់លានដុល្លារក្នុងគម្រោង 1MDB នេះ។
ទាក់ទងនឹងបញ្ហានេះ ក្រសួងយុត្តិធម៌អាមេរិក បានចោទប្រកាន់ថា លោក ណាជីប រ៉ាហ្សាក់ និងមន្រ្តីរបស់លោក ត្រូវបានក្រុមហ៊ុនមួយឈ្មោះ Jho Low ជួយសម្រួលឲ្យទឹកប្រាក់ដែលកេងប្រវ័ញ្ចពីគម្រោង 1 Malaysia Development Berhad មើលទៅដូចជាទឹកប្រាក់ដែលបានមកពីការប្រកបរបរដែលស្របច្បាប់។ តាមរយៈវិធីនេះ ទឹកប្រាក់ចំនួន៦៨១លានដុល្លារ ត្រូវបានដាក់ចូលក្នុងគណនីផ្ទាល់ខ្លួនរបស់លោក ណាជីប រ៉ាហ្សាក់។
ទោះយ៉ាងណាក៏ដោយ លោក ណាជីប រ៉ាហ្សាក់ បានបដិសេធថា លោកមិនបានប្រព្រឹត្តដូចការចោទប្រកាន់ទាំងអស់នោះទេ៕
