ចាប់តាំងពីឆ្នាំ១៩៩២ ដល់ខែឧសភា ឆ្នាំ២០១៩នេះ ប្រទេសវៀតណាមមានប្រធានាធិបតីចំនួន ៧រូប និងនាយករដ្ឋមន្ត្រីចំនួន ៤រូប ដែលបានផ្លាស់ប្តូរគ្នាជាបន្តបន្ទាប់ តែមិនបណ្តាលឱ្យមានជម្លោះផ្ទៃក្នុង ឬសង្គ្រាមដណ្តើមអំណាចគ្នានោះទេ។
នៅវៀតណាមនាយករដ្ឋមន្ត្រី និងប្រធានាធិបតីអាចកាន់តំណែងបានតែ២អាណត្តិ ក្នុង១អាណត្តិមានរយៈពេល៥ឆ្នាំ។ នៅក្នុងរដ្ឋធម្មនុញ្ញនៅក្នុងប្រទេសកុម្មុយនីស្តមួយនេះ ក៏បានបញ្ជាក់ដែរថា ក្នុងអំឡុងពេលកាន់អំណាច បើសិនជារកឃើញថា មានកំហុស ឬអសមត្ថភាព ក៏សមាជិកសភាអាចបោះឆ្នោតដក ឬព្យួរតំណែងបានដែរ។
មេដឹកនាំមួយចំនួនកាន់តំណែងមិនបានដល់១០ឆ្នាំ ឬស្មើ២អាណត្តិទេ ដោយសារមិនមានការគាំទ្រ ឬដោយសារបញ្ហាសុខភាព។ ចំណែកមេដឹកនាំខ្លះ ក៏ស្លាប់នៅក្នុងតំណែងដែរ។
ជាក់ស្តែងអតីតប្រធានាធិបតី លោក ត្រាង ដាយ ខ្វាង (Tran Dai Quang) ជាអតីតមន្ត្រីជាន់ខ្ពស់គណបក្សកុម្មុយនីស្ត បានកាន់តំណែងជាប្រធានាធិបតីចាប់ពីថ្ងៃទី២ ខែមេសា ឆ្នាំ២០១៦ ហើយទទួលមរណភាព ថ្ងៃទី២១ ខែកញ្ញា ឆ្នាំ២០១៨។ លោកទទួលមរណភាពពេលដែលលោកកាន់តំណែងជាប្រធានាធិបតី។
ក្រោយការទទួលមរណភាពលោក ត្រាង ដាយ ខ្វាង មានការតែងតាំងលោកស្រី ដាង ធី ង៉ុកធីញ ជាប្រធានាធិបតីបណ្តោះអាសន្នចាប់ពីខែកញ្ញា ដល់ខែតុលា ឆ្នាំ២០១៨ គឺរយៈពេល៣២ថ្ងៃ ទើបសភាប្រជាជនវៀតណាមបោះឆ្នោតជ្រើសរើសលោក ង្វ្រៀន ភូត្រុង កាន់តំណែងជាផ្លូវការចាប់ពីថ្ងៃទី២៣ ខែតុលា ឆ្នាំ២០១៨ ដល់បច្ចុប្បន្ន។
ទោះយ៉ាងណា បច្ចុប្បន្ន លោក ង្វ្រៀន ភូត្រុង កំពុងធ្លាក់ខ្លួនឈឺ ប៉ុន្តែ ស្ថានភាពនយោបាយនៅក្នុងប្រទេសនេះនៅតែរក្សាភាពស្ងប់ស្ងាត់ដដែល ហើយព័ត៌មានដែលមេដឹកនាំកំពូលធ្លាក់ខ្លួនឈឺនេះ មិនផ្សព្វផ្សាយទូលាយជាសាធារណៈនោះទេ។
អ្នកនាំពាក្យក្រសួងការបរទេសវៀតណាម លោកស្រី Le Thi Thu Hang ថ្លែងប្រាប់ទីភ្នាក់ងារព័ត៌មាន រ៉យទ័រ ថាលោក ង្វ្រៀន ភូត្រុង វ័យ៧៥ឆ្នាំ ធ្លាក់ខ្លួនឈឺកាលពីថ្ងៃទី១៤ ខែមេសា ដោយសារតែមានការងារច្រើនត្រូវធ្វើឱ្យហើយ និងបញ្ហាអាកាសធាតុប្រែប្រួល។ ចាប់តាំងពីពេលនោះមក មេដឹកនាំវៀតណាមរូបនេះមិនទាន់បានបង្ហាញមុខជាសាធារណៈទៀតទេ។
មាត្រា៨៨ នៃរដ្ឋធម្មនុញ្ញវៀតណាម បានចែងថា ប្រសិនបើប្រធានាធិបតីទទួលមរណភាព ឬត្រូវដកហូតតំណែងគឺអនុប្រធានាធិបតី ឬនាយករដ្ឋមន្ត្រីត្រូវតែងតាំងកាន់ការងារបណ្តោះអាសន្ន ហើយបើអនុប្រធានាធិបតីឬ នាយករដ្ឋមន្ត្រីត្រូវព្យូរការងារដែរ នឹងជ្រើសរើសរដ្ឋមន្ត្រី ឬ មន្ត្រីជាន់ខ្ពស់រដ្ឋាភិបាលផ្សេងទៀតឱ្យកាន់ការងារបណ្ដោះអាសន្ន។
មូលហេតុនៃការមានច្បាប់រឹងមាំក៏អាចជាហេតុផលមួយដែលទប់ស្កាត់មិនឱ្យមន្ត្រីជាន់ខ្ពស់ដណ្តើមអំណាចគ្នា។ នៅក្នុងរដ្ឋធម្មនុញ្ញវៀតណាមមាត្រា២បញ្ជាក់ថា ប្រទេសនេះប្រកាន់របបសង្គមនិយមផ្អែកទៅលើច្បាប់។
ម្យ៉ាងទៀតការដូរមេដឹកនាំមិនមានចលាចលនេះក៏បានបញ្ជាក់ថា មេដឹកនាំម្នាក់នេះមិនមែនជាអ្នកក្តោបអំណាចទូទៅទាំងអស់នោះទេ។
