រដ្ឋាភិបាលក្រុងប៉េកាំង បានប្រាប់ទៅសហរដ្ឋអាមេរិកឲ្យបញ្ឈប់រាល់ការគាបសង្កត់លើក្រុមហ៊ុនរបស់ខ្លួន ហើយបញ្ចប់រាល់ការភ្ជាប់រឿងរ៉ាវទាំងឡាយថា សុទ្ធតែប៉ះពាល់ដល់សន្តិសុខជាតិ។
ការអំពាវនាវរបស់មេដឹកចិនបែបនេះ បានធ្វើឡើងក្រោយពីសហរដ្ឋអាមេរិកបដិសេធសំណើរបស់ក្រុមហ៊ុនទូរសព្ទមួយរបស់ចិន ដែលស្នើផ្គត់ផ្គង់សេវាទូរគមនាគមន៍។
អ្នកនាំពាក្យក្រសួងការបរទេសចិន លោក Geng Shuang បានថ្លែងក្នុងសន្និសីទសារព័ត៌មានកាលពីថ្ងៃទី១០ ខែឧសភា ថារដ្ឋាភិបាលចិនតែងតែប្រាប់ដល់អ្នកវិនិយោគរបស់ខ្លួនឲ្យគោរពច្បាប់ និងគោលការណ៍ទីផ្សារអន្តរជាតិ ក៏ដូចជា ច្បាប់ក្នុងប្រទេសដែលពួកគេកំពុងរកស៊ីទទួលទាន។ លោក លើកឡើងបន្តថា ករណីដែលអាមេរិករារាំងក្រុមហ៊ុនមួយរបស់ចិនជាការបំពានលើគោលការណ៍សេដ្ឋកិច្ចទីផ្សារ ហើយស្នើឲ្យអាមេរិកបញ្ឈប់នូវទង្វើបែបនេះ។
លោក Geng Shuang បានជំរុញទៅសហរដ្ឋអាមេរិកថា៖ «បញ្ឈប់ការអនុវត្តដ៏ខុសឆ្គងក្នុងការភ្ជាប់សន្តិសុខជាតិទៅគ្រប់បញ្ហា។ បញ្ឈប់ការគាបសង្កត់ដោយអយុត្តិធម៌លើក្រុមហ៊ុនចិន ហើយត្រូវផ្ដល់បរិយាកាសយុត្តិធម៌ និងមិនរើសអើងចំពោះការវិនិយោគ និងប្រតិបត្តិការរបស់ពួកគេនៅក្នុងសហរដ្ឋអាមេរិក។»
កាលពីថ្ងៃទី៩ ខែឧសភា គណៈកម្មការសារគមនាគមន៍សហព័ន្ធរបស់អាមេរិក បានសម្រេចច្រានចោលសំណើរបស់ក្រុមហ៊ុន China Mobile USA ដែលស្នើសុំផ្គត់ផ្គង់សេវាទូរគមនាគមន៍រវាងអាមេរិក និងប្រទេសផ្សេងៗទៀតនៅជុំវិញពិភពលោក។
គណៈកម្មការសារគមនាគមន៍សហព័ន្ធរបស់អាមេរិក បានឲ្យដឹងក្នុងសេចក្តីប្រកាសព័ត៌មានរបស់ខ្លួនថា បន្ទាប់ពីការពិនិត្យ និងពិភាក្សាដោយយកចិត្តទុកដាក់ជាមួយអ្នកជំនាញ ពួកគេបានរកឃើញថា ក្រុមហ៊ុន China Mobile USA មិនបានបង្ហាញនោះទេក្នុងសំណើដែលស្នើសុំផ្គត់ផ្គង់សេវាទូរគមនាគមន៍ ថាវាធ្វើឡើងដើម្បីបម្រើប្រយោជន៍សាធារណៈ។
សេចក្តីប្រកាសព័ត៌មានដដែល បានលើកឡើងទៀតថា ប្រសិនបើមានការអនុញ្ញាតឲ្យ China Mobile USA ផ្គត់ផ្គង់សេវាទូរគមនាគមន៍ វានឹងធ្វើឲ្យប៉ះពាល់ដល់សន្តិសុខជាតិអាមេរិក ដោយថា ក្រុមហ៊ុននេះមានរដ្ឋាភិបាលចិននៅពីក្រោយ៕