អាជ្ញាធរវៀតណាម បានចាប់ខ្លួនបុរសម្នាក់កាលពីយប់ថ្ងៃអាទិត្យសប្តាហ៍មុន ក្រោយពីរកឃើញថាគាត់បាននាំចូលគ្រឿងញៀនចំនួន ៦៤គីឡូក្រាមពីប្រទេសកម្ពុជា។
តាមការចុះផ្សាយរបស់សារព័ត៌មានវៀតណាម VN Express បុរសជននោះបានលួចនាំចូលគ្រឿងញៀនពីកម្ពុជាតាមច្រកព្រំដែន។ ប្រភពដដែលឲ្យដឹង ក្នុងប្រតិបត្តិការណ៍នោះ អាជ្ញាធរខេត្តឡុងអាន បានរឹបអូសបានគ្រឿងញៀនប្រភេទហេរ៉ូអ៊ីនចំនួន ៧គីឡូក្រាម និងម៉ាទឹកកកចំនួន ៥៧គីឡូក្រាម។
បុរសវៀតណាមរូបនោះ បានសារភាពប្រាប់នគរបាលខេត្តឡុងអាន ថាគ្រឿងញៀនទាំង ៦៤គីឡូក្រាមនោះ ត្រូវបានលាក់ក្នុងកញ្ចប់តែ និងម្សៅទឹកដោះគោ ដែលដឹកមកពីប្រទេសកម្ពុជា សម្រាប់ចែកចាយក្នុងប្រទេសវៀតណាម។
ខេត្តឡុងអាន ជាខេត្តភាគខាងត្បូងឆៀងខាងលិចរបស់វៀតណាម ដែលមានព្រំប្រទល់ជាប់នឹងខេត្តស្វាយរៀងរបស់ប្រទេសកម្ពុជា។
សារព័ត៌មាន VN Express បានដកស្រង់សម្តីមន្រ្តីជាន់ខ្ពស់ផ្នែកប្រយុទ្ធប្រឆាំងគ្រឿងញៀនវៀតណាមម្នាក់ ថាដោយសារតែភូមិសាស្រ្តរបស់វៀតណាម មានព្រំដែនវែង មានផ្លូវសម្រាប់ធ្វើការជួញដូរទំនិញដោយខុសច្បាប់ជាច្រើនកន្លែង និងភាពខ្វះចន្លោះរបស់គយ ទើបបណ្ដាលឲ្យវៀតណាមក្លាយជាចំណុចនៃការចែកចាយគ្រឿងញៀនដ៏ធំ។
ទោះបីជាវៀតណាមមានច្បាប់ដាក់ទោសទណ្ឌលើអ្នកជួញដូរគ្រឿងញៀនដោយតឹងរឹងយ៉ាងណាក្តី ក៏នៅតែមានជនល្មើសលួចនាំចូលជាបន្តបន្ទាប់។ តាមច្បាប់របស់វៀតណាម ជនណាដែលរកឃើញថាមានគ្រឿងញៀនប្រភេទហេរ៉ូអ៊ីន ឬកូកាអ៊ីនលើសពី ៦០០ក្រាម ឬក៏មេតំហ្វីតាមីនចំនួន ២.៥ គីឡូក្រាម នឹងត្រូវប្រឈមមុខនឹងទោសប្រហារជីវិត៕
