សាលាឧទ្ធរណ៍របស់ទីក្រុងហុងកុងបានសម្រេចបន្ថយទោសជាប់ពន្ធនាគារដល់យុវជនដឹកនាំចលនាប្រជាធិបតេយ្យ Joshua Wong ពីជាប់ពន្ធនាគារ ៣ខែមកត្រឹម ២ខែវិញ ហើយនឹងត្រូវដោះលែងក្នុងរយៈពេល ៥ថ្ងៃទៀត។
នៅថ្ងៃព្រហស្បតិ៍ម្សិលមិញ សាលាឧទ្ធរណ៍ហុងកុងបានបើកសវនាការលើករណីរបស់យុវជន Joshua Wong ជាមេដឹកនាំបាតុកម្មឆ័ត្រទាមទារប្រជាធិបតេយ្យកាលពីឆ្នាំ២០១៤។ នេះបើតាមទីភ្នាក់ងារព័ត៌មានរ៉យទ័រ។
Joshua Wong អាយុ ២២ឆ្នាំ ត្រូវតុលាការសម្រេចឱ្យជាប់ពន្ធនាគា រ៣ខែ ដោយចោទថា បំពានបំរាមតុលាការចំពោះការហាមឃាត់យុវជននេះមិនឱ្យចូលតំបន់មួយចំនួនដែលច្បាប់របស់ចិនទើបអនុម័តរយៈពេលបីខែកន្លងមកនេះ។
យុវជនរូបនេះ ចេញមុខតវ៉ាជាមួយយុវជនផ្សេងទៀត ដើម្បីប្រឆាំងរដ្ឋអំណាចទីក្រុងប៉េកាំងដែលចង់គ្រប់គ្រងដែនដីមួយនេះតាមបែបកុម្មុយនីស្តទាំងស្រុង។
មូលហេតុសំខាន់មួយនៃការផ្ទុះការតវ៉ា គឺយុវជទាំងនេះចង់បោះឆ្នោតជ្រើសរើសមេដឹកនាំដោយផ្ទាល់ ប៉ុន្តែ រដ្ឋអំណាចកណ្តាលរបស់ចិនជាអ្នកជ្រើសតាំងមេដឹកនាំជំនួស។
ពេលចូលក្នុងសវនាការកាលពីម្សិលមិញ យុវជន Joshua Wong ថ្លែងថា គេអាចឃុំឃាំងរូបកាយគាត់បាន ប៉ុន្តែ មិនអាចឃុំឃាំងទឹកចិត្តរបស់ពួកគាត់បានទេ។
ហេតុផលមួយដែលចៅក្រមសម្រេចបន្ថយទោសនេះ ដោយសារតែពិចារណាថា យុវជនរូបនេះ មានវ័យនៅក្មេងពេក។
នៅហុងកុងនឹងមានចលនាតវ៉ានៅពេលថ្មីៗនេះទៀតមិនខាន ព្រោះក្រុមយុវជនទាំងនេះកំពុងតែប្រមូលគ្នាធ្វើបាតុកម្មប្រឆាំងទាមទារឱ្យរដ្ឋអំណាចទីក្រុងហុងកុងលុបចោលច្បាប់ធ្វើបត្យាប័ន ឬ ការបញ្ជូនអ្នកទោសចេញពីហុងកុងទៅឱ្យប្រទេសផ្សេង។ ពួកគេទាមទារមិនឱ្យមានការបញ្ជូនអ្នកទោសចេញពីហុងកុងទៅឱ្យប្រទេសផ្សេងទេរួមទាំងចិនផងដែរ។
អង់គ្លេសបានប្រគល់ដែនដីហុងកុងជាដែនដីអាណានិគមរបស់ខ្លួនេះទៅឱ្យចិនគ្រប់គ្រងវិញ កាលពីឆ្នាំ១៩៩៧ ប៉ុន្តែ ដាក់លក្ខខណ្ឌឱ្យចិនគោរពក្នុងរយៈពេល៥០ឆ្នាំ ធានាថា ដែនដីនេះ គ្រប់គ្រងតាមបែបប្រជាធិបតេយ្យ ផ្តល់សិទ្ធិសេរីភាពពេញលេញដល់ប្រជាពលរដ្ឋ។ ប៉ុន្តែ មានការចោទប្រកាន់ថា ចិនកំពុងតែរឹតត្បិតសេរីភាពប្រជាជននៅហុងកុងដូចការគ្រប់គ្រងតាមបែបកុម្មុយនីស្តទាំងស្រុង។
ស្របពេលដែលដែនដីហុងកុងកំពុងតែដើរតួនាទីយ៉ាងសំខាន់ជាតំបន់ពាណិជ្ជកម្មដោះដូរទំនិញរបស់ពិភពលោក រដ្ឋអំណាចចិនកាន់តែរឹតត្បិតបន្តិចម្តងៗ ពិសេសនៅក្នុងអំណាចដឹកនាំដោយលោក ស៊ី ជីនពីង។
តាមកិច្ចព្រមព្រៀង ៥០ឆ្នាំរវាងចិន និងអង់គ្លេស ដែលហៅថាប្រទេសមួយប្រព័ន្ធដឹកនាំពីរ គឺដឹកនាំហុងកុងតាមបែបប្រជាធិបតេយ្យរួមទាំងផ្តល់សិទ្ធិសេរីភាពពេញលេញនោះ នឹងចប់ត្រឹមឆ្នាំ២០៤៧។ ពេលនោះមានសំនួរជាច្រើនចោទឡើងថា តើពលរដ្ឋហុងកុងដែលធ្លាប់រស់នៅក្នុងភាពស៊ីវីល័យ រួមទាំងសេរីភាពពេញលេញអាចរស់នៅក្រោមអំណាចចិនដែរឬទេ? ហើយបើពលរដ្ឋហុងកុងងើបតវ៉ា តើអាចនឹងមានសង្គ្រាមស៊ីវិលកើតឡើងនៅចិនទៀត ឬយ៉ាងណា?
ទាក់ទងការឃុំខ្លួនយុវជន Joshua Wong អ្នកជំនួញ អ្នកច្បាប់ និងក្រុមរដ្ឋាភិបាលនៅប្រទេសលោកខាងលិចបារម្ភខ្លាចមានការបញ្ជូនយុវជនរូបនេះទៅតុលាការរដ្ឋអំណាចទីក្រុងប៉េកាំង។
ទោះយ៉ាងណា ចាប់តាំងពីក្រុមយុវជនទាំងនេះចេញមុខតវ៉ាទាមទារប្រជាធិបតេយ្យមក ពួកគេជាប់ពន្ធនាគារជាបន្តបន្ទាប់ ហើយកម្រិតទោសមិនសូវជាយូរប៉ុន្មានទេ ហាក់បញ្ជាក់ថា តុលាការនៅហុងកុងមិនរងឥទ្ធិពលពីរដ្ឋអំណាចទីក្រុងប៉េកាំងនោះទេ។